गुल्मी । गुल्मीमा होम क्वारेन्टाइनमा बसेका एक जना पुरुषको मृत्यु भएको छ ।
छत्रकोट गाउँपालिका–५ मैनडाँडा निवासी ६९ वर्षीय पुरुषको मृत्यु भएको जिल्ला प्रहरी कार्यालय गुल्मीले जानकारी दिएको छ ।
उनी गत जेठ २५ गते भारतबाट आएर होम क्वारेन्टाइनमा बस्दै आएका थिए । प्यारालाइसिसको बिरामी उनी भारतमा उपचार गरेर फर्किएका थिए ।
बिहीबार आरडीटी टेस्ट गर्दा उनमा एन्टिबडी पोजेटिभ रिपोर्ट आएको गाउँपालिकाका स्वास्थ्य संयोजक पुण्य पौडेलले जानकारी दिए ।
शव व्यवस्थापन गर्न नेपाली सेना घटनास्थल पुगेको छ ।
मृतक पुरुषमा कोरोना संक्रमण थियो कि थिएन भनेर स्वाब परीक्षण गर्न प्रादेशिक प्रयोगशाला रुपन्देहीमा पठाइएको छ ।
गुल्मी जिल्लामा हालसम्म कोरोना संक्रमितको संख्या १०५ पुगेको छ । संक्रमितमध्ये ३ जना उपचारपछि घर फर्किएका छन् । जिल्लामा कोरोना संक्रमणबाट जना २ जनाको मृत्यु भइसकेको छ ।
