सर्लाहीमा जबर्जस्ती नेपाल प्रवेश गर्न खोज्ने भारतीयको समूहमाथि सशस्त्र प्रहरीले गोली प्रहार गरेको छ ।
सर्लाहीको पर्सामा भएको उक्त घटनामा गोली लागेर एक जनाको मृत्यु भएको र पाँच जना घाइते भएका छन् ।
नेपाल प्रवेश गर्न खोज्ने भारतीय समूहलाई रोक्न खोज्दा उनीहरुबाट आक्रमण भएपछि गोली चलाउनु परेको सशस्त्र प्रहरीले जनाएको छ ।
त्यस क्रममा पाँच जना भारतीयलाई गोली लागेको बताइएको छ ।
गोली लागेर एक जना भारतीय नागरिकको मृत्यु भएको बताइएको छ । जिल्ला प्रहरी कार्यालय सर्लाहीले यसको पुष्टि गर्न बाँकी छ। मृतकको परिचय खुलिसकेको छैन ।
पर्सा गाउँपालिकास्थित नारायणपुर नाकाबाट भारतीय नागरिक जबर्जस्ती नेपाल प्रवेश गर्न खोज्दा झडप भएको हो। त्यस क्रममा भारतीय नागरिकले सशस्त्र प्रहरीको एसएलआर हतियार पनि खोसेका थिए ।
हतियार खोस्ने व्यक्तिलाई पक्राउ गरिएको सशस्त्र प्रहरी स्रोतले जनाएको छ । सशस्त्रले गोली चलाएपछि उनीहरु भारततिरै भागेका छन् ।
सशस्त्र प्रहरीले एक दर्जन हवाई फायर गरेको थियो ।
