दैलेख । दैलेखको महाबु गाउँपालिकाको क्वारेन्टाइमा रहेका एक हजारलाई घर पठाएको छ ।
आरडीटी परीक्षण गर्दा रिपोर्ट नेगेटिभ आएपछि उनीहरुलाई घर पठाइएको हो ।
भारतबाट आएर १४ दिन क्वारेन्टिनमा बसेका उनीहरुको पीसीआर परीक्षण नगरी आरडीटी मात्र गरी घर पठाइएको जनाएको छ ।
नेपालमा आरडीटी परीक्षणलाई भरपर्दो परीक्षण मानिँदैन । त्यसैले उनीहरुलाई कोरोना लागेको छ वा छैन भनी पीसीआर नै गर्नुपर्ने हुन्छ ।
तर, क्वारेन्टिनमा राख्ने ठाउँ नभएको, पीसीआर परीक्षणको रिपोर्ट समयमा नआउनेजस्ताकारण देखाउँदै स्थानीय तहका जनप्रतिनिधिले करिब एक हजारलाई परिवारको रोहवरमा जिम्मा लगाएका हुन् ।
गाउँपालिकाले जेठ २१ देखि २५ गतेसम्म क्वारेन्टिनमा आएका एक हजार ७६ जनाको आरडीटी विधिबाट परीक्षण गर्दा ७६ जनामा कोरोना एन्टीबडी पोजेटिभ आएको बताइएको छ ।
आरडीटी नेगेटिभ आएकाहरुलाई वडा अध्यक्ष, गाउँपालिकाको स्वास्थ्य शाखा, सुरक्षा निकाय र परिवारको एकजना सदस्यको रोहवरमा दश दिन होम क्वारेन्टिनमा बस्ने गरी घर पठाइएको गाउँपालिकाको स्वास्थ्य शाखाले जनाएको छ ।
तर, आरडीटी पोजेटिभहरुलाई भने क्वारेन्टाइनमै राखिएको छ ।