रुपन्देही । बुटवलको कोरोना विशेष आइसोलेसन सेन्टरमा रहेका ८ वर्षीया एक बालिकासहित नौ जना संक्रमित कोरोनामुक्त भएर घर फर्किएका छन् ।
बुटवल–१० स्थित एन्फा फुटबल सेन्टरमा रहेको आइसोलेसन सेन्टरमा उनीहरुको विभिन्न चरणमा गरिएको कारोना परीक्षणमा संक्रमण नदेखिएपछि आइतबार डिस्चार्ज गरिएको हो ।
डिस्चार्ज हुनेहरुलाई बुटवलका प्रमुख शिवराज सुवेदीले पुष्पगुच्छा प्रदान गर्दै बिदाई गरे ।
आइतबार डिस्चार्ज हुनेमा कपिलवस्तुका ८ र रुपन्देहीका १ जना रहेका छन् । उनीहरु संक्रमण पुष्टि भएपछि गत जेठ ११ गते बुटवल–१० स्थित आइसोलेसन सेन्टरमा भर्ना हुन आएका थिए ।
भर्ना भएकामध्ये ७ जना भारतबाट आएका थिए । उनीहरुमध्ये दुई जनालाई सामान्य ज्वरो देखिए पनि अरु कसैमा पनि कुनै लक्षण नदेखिएको आइसोलेसनमा खटिएका बुटवलका स्वास्थ्यकर्मीले बताए ।
दुई जना भने घरमै रहेका बेला संक्रमित भएको भन्दै बुटवलमा आएका थिए ।
कपिवलस्तुका एक जना वडाध्यक्ष र आठ वर्षीया बालिका पनि कोरोनामुक्त हुँदै डिस्चार्ज भएका हुन् ।
उनीहरु बाहेक अरु सबै जना भारतबाट आएका हुन् । अब यहाँको आइसोलेसनमा ३२ जना छन् ।
