रौतहट । रौतहटमा स्थानीय र प्रहरीबीच झडप भएको छ । स्थितिलाई नियन्त्रणमा लिन प्रहरीले १२ राउण्ड हवाई फायर गरेको छ ।
कोरोना भाइरस संक्रमितलाई आइसोलेसनमा लैजानका लागि पुगेको प्रहरी र स्वास्थ्यकर्मीलाई स्थानीयले रोक्न खोजेपछि तनाव सुरु भएको हो ।
शुक्रबार बिहान रौतहटको इशनाथ नगरपालिका ७ मा यो घटना भएको हो ।
इशनाथ नगरपालिका–७ को जोकाहास्थित अनवारुल इस्लामिक मदरसाको क्वारेन्टाइनमा राखिएका दुई जना व्यक्तिलाई आइसोलेसनमा लैजाने विषयमा विवाद भएपछि झडपसम्मको स्थिति आइपुगेको हो ।
दुई संक्रमितलाई अर्को स्थानमा रहेको आइसोलेसनमा लैजान पुगेका चिकित्सक र सुरक्षाकर्मीलाई स्थानीयले त्यहीँ राख्न माग गर्दै अवरोध गरेपछि विवाद भएको प्रहरीले जानकारी दिएको छ ।
स्थानीयले प्रहरीको गाडी समेत तोडफोड गरिदिएका छन् ।
प्रहरी र स्वास्थ्यकर्मीमाथि स्थानीय जाइलागेपछि जिल्ला प्रहरी कार्यालय, रौतहटबाट थप प्रहरी घटनास्थल पुगेका थिए ।
