कार्यस्थलमा खटिएका सुरक्षाकर्मीलाई सङ्क्रमण बढेपछि चारै वटा सुरक्षा निकायले सतर्कता बढाएका छन् । कोरोना नियन्त्रणमा अग्रमोर्चामा खटिएका सुरक्षाकर्मीमा कोरोना सङ्क्रमण बढ्न थालेपछि उच्च सतर्कता अपनाइएको हो ।
सामूहिक रूपमा ब्यारेकमा बस्ने नेपाली सेना, नेपाल प्रहरी, सशस्त्र प्रहरी पनि कोरोनाको उच्च जोखिममा छन् । अझ ब्यारेकमा एउटा व्यक्तिमा मात्रै कोरोना देखिएको अवस्थामा त्यसले भयावह रूप लिन सक्ने जोखिम हुन्छ । अर्कोतर्फ एकै ठाउँमा ठुलो सङ्ख्यामा खटिने, एकै मेसमा खाना खाने, एउटै गाडी चढ्ने भएकाले पनि सुरक्षा निकायमा सङ्क्रमण बढ्ने जोखिम हुन्छ ।
अझ सबै सुरक्षा निकायमा पर्याप्त मास्क, पन्जा, स्यानिटाइजरलगायतका सामाग्री समेतको अभाव छ । जसकारण सुरक्षाकर्मीहरुमा सक्रमणको उच्च जोखिम छ । त्यसैको उनीहरूले पूर्वसावधानीस्वरुप सुरक्षा निकायले आफ्नो तयारी तीव्र पारेका हुन् ।
जवानदेखि अधिकृतसम्म सङ्क्रमित
बिदाबाट फर्केकाहरूलाई सेल्फ क्वारेनटाइनमा राख्नेदेखि फिल्डमा खटिँदा उच्च सतर्कता अपनाउन थालिएको छ । अहिलेसम्म विभिन्न निकायका नौ जना सुरक्षाकर्मी कोरोना भाइरसबाट सङ्क्रमित छन् । आइतबार साँझसम्मको तथ्यांकअनुसार कोरोना सङ्क्रमित २९५ जनामध्ये ९ जना सुरक्षाकर्मी रहेका हुन् ।
सङ्क्रमित हुनेहरू सशस्त्र प्रहरी बलका तीन जना, नेपाल प्रहरीका तीन जना र नेपाल सेनाका दुई र राष्ट्रिय अनुसन्धान विभागका एक जना छन् । शनिबर मात्रै तीन जना सुरक्षाकर्मीमा कोरोना भाइरस देखिएको थियो । जसमा जिल्ला प्रहरी कार्यालय बारामा कार्यरत एक प्रहरी जवान, नेपाली सेनाको मध्यपृतनामा कार्यरत सेनाका एक उच्च अधिकारी छन् । सोही ठाउँमा कार्यरत अर्का एक सैनिकमा कोरोना सङ्क्रमण देखिएको छ ।
सेल्फ क्वारेनटाइनदेखि उच्च सतर्कता
सुरक्षाकर्मीमा जवानदेखि, उच्च अधिकृतसम्म सङ्क्रमित भएको पाइएको छ । विशेषगरी भारतसँगको सीमा नाका, संक्रमित क्षेत्र, सङ्क्रमित व्यक्तिको सम्बन्धमा आवश्यक सूचना सकंलन, बन्दाबन्दी कार्यान्वयन र उपत्यका प्रवेश नाकामा खटिएका सुरक्षाकर्मीहरू बढी जोखिममा देखिन्छन् ।
जोखिम बढेपछि नेपाल प्रहरीले फिल्डमा खटिनेहरूको परीक्षण बढाउने तयारी थालेको प्रवक्ता डिआइजी नीरज शाहीले बताए ।
‘बिदाबाट फर्कनेलाई १४ दिन अनिवार्य क्वारेनटाइनमा राखेर परीक्षण गरेर मात्र डिउटीमा खटाउन थालेका छौँ, जनसम्पर्कमा प्रत्यक्ष जानेहरूलाई सम्भव भएसम्म पिपिईलगायत स्वास्थ्य सामग्रीको प्रयोगमा जाड दिएका छौँ,’ उनले भने । स्वास्थ्य सुरक्षा सावधानीको विषयमा नियमित रूपमा कार्यालय प्रमुखले बिफ्रिङ गर्न थालेको समेत उनले बताए ।
सीमामा बढी जोखिम
चार वटै सुरक्षा निकायमध्ये तुलनात्मक रूपमा सशस्त्र प्रहरीलाई कोरोना सङ्क्रमणको जोखिम देखिएको छ । भारतसँगको सीमा क्षेत्रमा सशस्त्र प्रहरीको टोली खटिएको छ । जहाँ भारतबाट आउनेहरूलाई नियन्त्रण गर्नुपर्ने अवस्था छ । अहिले पछिल्लो समय कोरोना सङ्क्रमण देखिएकाहरू भारतबाटै आएका हुन् ।
सङ्क्रमण दर उच्च भएको ठाउँमा आएकाहरूसँग रहनुपर्ने भएकाले सशस्त्र प्रहरीलाई बढी जोखिम देखिएको प्रवक्ता डिआइजी प्रविणकुमार श्रेष्ठ बताउँछन् । उनले भने ‘कोरोना रोकथामको मुख्य अस्त्र मानिएको सामाजिक दुरीलाई सबैले कायम गरेर काम गर्ने मापदण्ड त छ तर व्यवहारमा कति लागू हुन सकेको छैन, जोखिम भएकाले सभव भएसम्म पिपिई प्रयोग बढाइएको छ ।’
ट्राफिकलाई पिपिई
लकडाउनमा गुड्ने सवारी साधन चेकजाँचमा कडाइ गरिएको छ । सवारी साधन चेकको लागि नाकादेखि सडकका चोकचोकमा जनपथ प्रहरीसँगै ट्राफिक खटिएका छन् । बटुवाहरू र सवारी चालकसँग प्रत्यक्ष सम्पर्कमा जानुपर्ने भएकाले उपत्यकामा ट्राफिक प्रहरी पिपिई लगाएर चेकजाँचमा खटाइएको छ ।
सडकमा हिँडडुल र ढुवानी गर्ने चालकमा समेत कोरोनाको सङ्क्रमण भएको हुनसक्ने भएकाले ट्राफिक प्रहरीको स्वास्थ्य सुरक्षाका लागि सुरक्षा उपकरणको प्रयोग गर्न थालिएको महानगरीय ट्राफिक प्रहरी महाशाखाका प्रमुख एसएसपी भीम ढकालले बताए । उनले भने– ‘कार्यक्षेत्रमा खटिँदा दुरी कायम गर्न भनेका छौँ । हामीसँग उपलब्ध पिपिई प्रयोग गराएका छौँ । उच्च सतर्क भएका काम गर्न निर्देशन दिएका छौँ ।’
यस्तै नेपाली सेनाले समेत उच्च सतर्कता अपनाएको छ । मातहतका कर्मचारीलाई प्रधानसेनापति उच्च सतर्कता अपनाउन १० बुँदे निर्देशन दिएका छन् ।