धुलिखेल । काभ्रेको धुलिखेल अस्पतालमा उपचारको लागि भर्ना भएकी एक महिलाको मृत्यु भएको छ । महिलाको मृत्युपछि अहिले अस्पताल 'सिल' गरिएको छ।
उक्त महिला ९ दिनको सुत्केरी भएको अस्पताल स्रोतले जानकारी दिएको छ ।
स्रोतका अनुसार, महिलाको कोरोना परीक्षण रिपोर्ट शंकास्पद आएपछि अस्पताल नै सिल गरिएको हो।
स्वासप्रस्वासमा समस्या देखिएपछि ती महिलालाई बिहीबार धुलिखेल अस्पताल ल्याइएको थियो । अस्पतालको भेन्टिलेटरमा राख्ने क्रममा महिलाको मृत्यु भएको हो ।
ती महिला ९ दिनअघि काठमाडौंको महाराजगन्जस्थित त्रिवि शिक्षण अस्पतालमा सुत्केरी भएकी थिइन् ।
उनको पीसीआर परीक्षणका लागि राष्ट्रिय जनस्वास्थ्य प्रयोगशाला टेकु पठाइएको छ ।
काभ्रेका जनस्वास्थ्य कार्यालय प्रमुख नरेन्द्र झाले महिलाको रिपोर्ट आउन बाँकी रहेको बताए ।
महिलाको स्वाब धुलिखेल अस्पतालमै परीक्षण गरिएकोमा रिपोर्ट शंकास्पद आएपछि उनको स्वाब परीक्षणका लागि राष्ट्रिय जनस्वास्थ्य प्रयोगशाला काठमाडौं पठाइएको अस्पताल स्रोतले जनाएको छ।