कोरोना भाइरस (कोभिड–१९) सङ्क्रमणको जोखिम कम गर्न गरिएको लकडाउनको समयमा पनि बाहिरी जिल्लाबाट मानिसहरू काठमाडौं भित्रिन नरोकिएपछि काठमाडौं प्रवेशमा कडाइ गरिएको छ ।
बहिरी जिल्लाबाट मानिसहरु आवतजावत गर्दा काठमाडौंमा कोरोनाको जोखिम बढ्ने भन्दै काठमाडौं प्रवेश गर्ने विभिन्न नाकामा चेक जाँच कडाइ गरिएको हो ।
५० लाखभन्दा बढी जनसङ्ख्या रहेका काठमाडौंमा यसअघि थोरै मात्र बाहिरिएका छन् । यसअघि उपत्यकाबाट बाहिरिने संख्या धेरै हुने गरेकोमा पछिल्लो केही दिनदेखि भने उपत्यका भित्रिन खोज्ने बढेपछि नाकामा थप कडाइ गरिएको हो ।
तराईका केही जिल्लामा कोरोना सङ्क्रमणको दर बढ्दै गएपछि काठमाडौं सुरक्षित हुने भन्दै मानिसहरु काठमाडौं भित्रिने प्रयास गरेपछि अत्यावश्यक काम बाहेकको अवस्थामा आउन रोक लगाइएको प्रहरीले जनाएको छ ।
पछिल्लो एक सातामा पहुँचका आधारमा पास लिएर विना काम उपत्यका छिर्न खोज्ने करिब ७ सयभन्दा बढी सवारीसा धनलाई फर्काएको काठमाडौं प्रहरी प्रमुख एसएसपी श्याम ज्ञवालीले बताए । ‘हामीले भित्रिएका हरेक यात्रुको विवरण सङ्कलन गरेका छौँ, तर बाहिरै फर्काइएकाहरूको डाटा राखेका छैनौं। दैनिक सय भन्दा बढी सवारी फकाईएका छन्, ती मध्ये, धेरैजसोले पास लिएका थिए’ ज्ञवालीले भने ।
अत्यावश्यक कामका लागि काठमाडौं भित्रिनेहरूको भने स्वास्थ्यसमेत परीक्षण गरराईएको छ । तराइका केही जिल्लामा कोरोना सङ्क्रमण विस्तार भएपछि अत्यावश्यक सेवाबाहेकको अवस्थामा उपत्यकाबाहिरबाट आउन रोक लगाइएको उनले बताए ।
यसरी नाकाबाट फर्काइने सवारीसाधनमा एम्बुलेन्स समेत छन् । कतिपय एम्बुलेन्सले समेत बिरामी भनेर यात्रु बोक्ने गरेको पाइएपछि फर्काइएको हो । काठमाडोै उपत्यकाका अन्य नाकामा पनि विनाकाम उपत्यका छिर्न खोज्ने यात्रुलाई रोकिएको छ ।
बिहीबार काठमाडौं प्रवेश गर्ने मुख्य नाका नागढुंगामा प्रहरी महानिरीक्षक ठाकुर ज्ञवालीले समेत अवलोकन गरेका थिए । नागढुंगा नाकाको निरीक्षणका लागि पुगेका आइजीपी ज्ञवालीले सुरक्षामा खटिएका अधिकारीलाई अत्याआवश्यक बाहेक कुनै पनि सवारी साधन काठमाडौं प्रवेश गर्न नदिन निर्देशन दिएका थिए ।
उता भक्तपुरको जगाती नाकामा उपत्यका भित्रिने सम्पूर्ण यात्रुको विवरण राख्न थालिएको छ । नाकामा कोरोना डेस्क नै स्थापना गरी अत्यावश्यकबाहेक पास भएका सवारीलाई समेत फर्काउन थालिएको छ ।
केही समयअघि स्थानीय तहहरूले अलपत्र परेका आफ्ना नागरिकलाई बस रिजर्भ गरेर विभिन्न गन्तव्यमा लगे पनि गृह मन्त्रालयको कडाइपछि हाल बन्द भएको हो ।