बाँकेको नेपालगन्जमा नेपालमा थप सात जना कोरोना भाइरस सक्रमित भेटिएसँगै नेपालमा सक्रमित भएकाहरूको सङ्ख्या ८२ पुगेको छ । स्वास्थ्य तथा जनसङ्ख्या मन्त्रालयका सह प्रवक्ता समीर कुमार अधिकारीले चार जना महिला र तीन जना पुरुषमा संक्रमण भएको पुष्टि गरेका छन् ।
मङ्गलवार भेरी अस्पताल नेपालगन्जमा गरिएको परीक्षणमा ९, ३२, ३४ र ५५ वर्षका महिला तथा २२, ३० र ४० वर्षका पुरुषमा कोरोना पुष्टि भएको हो । उनीहरू सबैको स्वास्थ्य सामान्य छ । नयाँ सातै जना सक्रमित बाँकेको नेपालगन्ज उपमहानगरपालिका वडा नम्बर ८ का रहेका स्वास्थ्य तथा जनसङ्ख्या मन्त्रालयले जनाएको छ । यसअघि बाँकेमा १५ जना सक्रमित फेला परेका थिए । सक्रमित बढेसँगै नेपालगन्जमा कोरोना परीक्षणलाई तीव्र बनाइएको छ । सक्रमितको सङ्ख्या बढेपछि नेपालगन्जमा आज (मङ्गलवार) २५ गतेसम्मलाई निषेधित क्षेत्र घोषणा गरिएको छ ।
पछिल्ला दिनमा विभिन्न विषयले नेपालको राजनीति तरङ्गित भएकाले कोरोना भाइरसको चर्चा कम भएको छ । तर सक्रमित थपिने क्रम भने रोकिएको छैन । सुरुवाती दिनमा एक वा दुई जना कोरोना सक्रमित भेटिदा निकै चर्चा हुन्थ्यो । त्रास र सतर्कता हुन्थ्यो । तर पछिल्ला दिनमा नेपालमा कोरोना सक्रमित भेटिनु सामान्य जस्तै भइसक्यो ।
कोरोना संक्रमणको तेस्रो चरणमा पुगेको नेपालगन्ज, उदयपुरलगायतका ठाउँमा त्रास छ। अरू ठाउँका सर्वसाधारणले भने सक्रमित भेटिएको खबर सुन्दा सामान्य रूपमा लिन थालिसकेका छन् । तर दिनप्रतिदिन सक्रमितको सङ्ख्या बढ्दै जाँदा नेपाल थप जोखिममा पर्दै गएको छ । सरकारले परीक्षणको दायरा बढाएसँगै कोरोना सक्रमितको सङ्ख्या बढ्दै गएको छ ।