कोरोना भाइरसको सङ्क्रमण काठमाडौँमा भित्रिन नदिनको लागि मुख्य नाका नागढुंगामा आधुनिक ‘डिस्इन्फेक्सन टनेल’ निर्माण गरिएको छ । काठमाडौँ भित्रिने गाडीहरूलाई संक्रमणमुक्त गर्न ‘डिस्इन्फेक्सन टनेल’ बनाइएको चन्द्रागिरि नगरपालिकाले जनाएको छ । काठमाडौँमा बिजुली बस चलाइरहेको सुन्दर यातायात प्रालिले आफ्नै खर्चमा टनेल बनाएको हो । टनेलमा चन्द्रागिरि नगरपालिकाले स्थान, पानीको व्यवस्थापन सुरक्षाको प्रवर्द्धन गरेको मेयर घनश्याम गिरीले बताए ।
सुन्दर यातायातका अध्यक्ष भेषबहादुर थापाले केन्द्र सरकार, चन्द्रागिरि नगरपालिकाबाट अनुमति लिएर ‘इन्फेक्सन टनेल’ बनाइएको बताए । टनेल शुक्रबारबाट सञ्चालनमा आउने छ । त्यो सञ्चालनमा आएपछि सबै सवारी साधन निसंक्रमण गरेपछि मात्र राजधानी प्रवेश गर्न पाउनेछन् । काठमाडौँ भित्रिने गाडीहरू टनेलमार्फत गुड्नुपर्ने छ ।
टनेलभित्र प्रवेश गर्दा गाडीको बाहिरी भागमा भाइरस मार्ने औषधि छर्किइन्छ जसका कारण कोरोना भित्रिन रोक्न मद्दत पुग्ने विश्वास गरिएको छ । नागढुंगामा टनेलले राम्रो नतिजा दिए फर्पिङ नाकामा पनि निर्माण गर्ने योजना रहेको सुन्दर यातायात प्रालिका अध्यक्ष थापाले बताए ।
