काठमाडौं । कोरोना भाइरस संक्रमणको जोखिम नियन्त्रण गर्नको लागि भारतमा लगाइएको लकडाउन खुकुलो गरिने भएको छ ।
आवश्यक सुरक्षाका उपाय अपनाएर पसलहरू खोल्न सकिने भारतको गृह मन्त्रालयले सूचना जारी गरेको छ ।
तर पसलमा ५० प्रतिशत भन्दा बढी कामदार राख्न पाइने छैन । कामदारहरूले मास्कको अनिवार्य प्रयोग र दुरी कायम गर्नुपर्नेछ ।
मदिरा पसलहरू सञ्चालनको अनुमती भने दिइएको छैन । अत्याधिक संक्रमित रहेका र जोखिम क्षेत्रमा पसल खोल्न पाइने छैन ।
केन्द्र सरकारले गुजरात, तेलंगाना र तमिलनाडुको चार जिल्लालाई उच्च निगरानीमा राखेको छ ।
भारतीय स्वास्थ्य मन्त्रालयका अनुसार त्यहाँ कुल संक्रमित संख्या २४ हजार ५०५ भन्दा बढी पुगेको छ । जसमध्ये ७७५ जनाको ज्यान गइसकेको छ ।
भारतमा पहिलो चरणमा १२ चैतबाट २ वैशाखसम्मका लागि लकडाउन घोषणा गरिएको थियो । संक्रमण तिव्र रुपमा फैलिएपछि लकडाउन पनि २१ वैशाखसम्मका लागि बढाइएको छ ।
