काठमाडौं । आफ्ना देशका नागरिक लिनका लागि रुसी विमान आज बिहान साढे १० बजे नेपाल आउने भएको छ । रुसको रोयल फ्लाइट एयरलाइन्सको चार्टर्ड विमान साढे १० बजे काठमाडौं त्रिभुवन विमानस्थल अवतरण गर्ने स्रोतले जनाएको छ ।

कोरोना भाइरस र त्यसको महामारीमा गरिएको लकडाउनका कारण रोकिएका आफ्ना नागरिकलाई लिन रुसियन दूतावासले विमान चार्टर गरेको छ ।  

सोमबार बिहान साढे १० बजे काठमाडौं आइपुग्ने उक्त विमान दिउँसो साढे १२ बजे फर्कने नेपाल नागरिक उड्डयन प्राधिकरणले जनाएको छ । साथै, सो विमानले १ सय ४३ आफ्ना देशका नागरिक लिएर फर्किने छ ।