जनकपुर । प्रदेश २ को जनकपुरधाममा दुई जना महिलाले सडकमा १० रुपैयाँका नोटहरु फालेर भागेका छन् ।
शुक्रबार दिउँसो उनीहरुले सडकमा यत्रतत्र १० रुपैयाँका नोट फालेर भागेको स्थानीयले बताएका छन् ।
जनकपुरधाम वडा नम्बर ४ स्थित महावीर चोकमा अपरिचित दुई महिलाले सडक र पसल अगाडी पैसा फालेर भागेपछि स्थानीयवासी त्रसित बनेका छन् ।
स्थानीयवासीहरुले कोरोना संक्रमण फैलाउने उद्धेश्यले ती महिलाले पैसा छरेर भागेको हुनसक्ने आशंका गरेका छन् ।
निलो र हरियो रंगको साडी लगाएका ती महिलाले करिब सय मिटरको दूरीसम्म सडकमा र पसल अगाडी १० रुपैयाँको नोट फालेको स्थानीयले बताए ।
स्थानीयले सडकमा किन यसरी पैसा फालेको भनेर सोधेपछि ती महिलाहरु पेठिया बजारतर्फ भागेको बताइएको छ ।
‘निलो र हरियो रंगको लुगा लगाएकी मुस्लिमजस्तै देखिने दुईजना महिलाहरुले पैसा फालेर भागेका एक स्थानीयले बताए ।
ती महिलाहरुले फालेको पैसा केही मानिसले टिपेका छन् । घटनापश्चात स्थानीयले प्रहरीलाई जानकारी गराएका थिए ।
प्रहरीले नोट छरिएको ठाउँमा तत्कालै सेनिटाइजर छर्केको छ । सडकमा छरिएका केही नोट प्रहरीले समेत टिपेको छ ।
सडकमा नोट फाल्ने महिलाको खोजी भइरहेको जिल्ला प्रहरीले जनाएको छ ।
साथै सडकमा छरिएका नोट टिप्ने स्थानीयको समेत खोजी भइरहेको प्रहरीले जनाएको छ।
