काठमाडौं । सरकारले शुक्रबार र शनिबार सर्वसाधारणलाई काठमाडौं उपत्यका बाहिर जान दिने भएको छ ।
कोरोना भाइरस संक्रमणको जोखिमलाई मध्यनजर गर्दै सरकारले घोषणा गरेको लकडाउनका कारण काठमाडौंमा रोकिएकाहरुलाई काठमाडौं बाहिर जान दिइने भएको हो ।
तर, उपत्यका बाहिरबाट काठमाडौं आउन भने दिइने छैन ।
उपप्रधानमन्त्री तथा रक्षामन्त्री ईश्वर पोखरेलको नेतृत्वमा बिहीबार बसेको बैठकले दुई दिन (शुक्रबार र शनिबार) सर्वसाधारणलाई उपत्यका बाहिर जान दिने निर्णय गरेको हो ।
लकडाउन लम्बिएपछि मानिसहरु हिडेरै काठमाडौंबाट बाहिर जाने क्रम बढिरहेको छ ।
काठमाडौं उपत्यकामा अलपत्र परेकाहरुलाई राजमार्गका विभिन्न स्टेशनहरुमा पुर्याइदिने बैठकले निर्णय गरेको छ ।
छोटो दुरीको हकमा कसरी जान दिने भन्ने तय भइसकेको छैन । यसबारे गृह मन्त्रालयले गृहकार्य गरिरहेको छ ।
