काठमाडौं । चीनको ग्वाङ्झाओबाट स्वास्थ्य समाग्री लिएर नेपाल एयरलाइन्सको वाइडबडी जहाज काठमाडौं अवतरण गरेको छ ।
नेपाल एयरलाइन्सको ए ३३० जहाज आज (शुक्रबार) बिहान त्रिभुवन विमानस्थल आइपुगेको हो ।
स्वास्थ्य उपकरण लिन जहाज बिहीबार बिहान साढे ११ बजे काठमाडौंबाट चीनको ग्वाङझाओ उडेको थियो ।
निजी अस्पतालका सञ्चालकहरुले कोरोना भाइरस संक्रमितको उपचारका लागि आवश्यक सामग्री लिन सो जहाज चार्टर्ड गरेर चीन लगेका थिए ।
उक्त जहाजमा चौधरी फाउन्डेसन, नर्भिक अस्पताल लगायतका निजी अस्पतालका स्वास्थ्य सामाग्री रहेको बताइएको छ । तर, जहाजमा के–कति सामान आयात गरिएको छ, त्यो भने यकिन भएको छैन ।
यसअघि नेपाल सरकारले चीनबाट स्वास्थ्य सामाग्री ल्याएको थियो ।
बिना प्रतिस्पर्धा निकै महँगो मूल्यमा स्वास्थ्य उपकरण खरिद सम्झौता गरिएको भन्दै सरकारको व्यापक आलोचना समेत हुँदै आएको थियो ।
त्यसपछि स्वास्थ्य सेवा विभागले ओम्नी विजनेश कर्पोरेट इन्टरनेसनलसँग भएको उपकरण खरिद सम्झौता रद्द गरिसकेको छ ।