कोरोना भाइरस (कोभिड–१९) को जोखिम कम गर्ने प्रयास स्वरूप सरकारले औषधि (स्प्रे) छर्न थालेको छ । पहिलो चरणमा त्रिभुवन अन्तर्राष्ट्रिय विमानस्थलमा स्प्रे थालिएको हो । थप सतर्कता अपनाउने भन्दै स्वास्थ्य तथा जनसङ्ख्या मन्त्रालयले (स्प्रे) छर्न सुरु गरेको हो । ‘पहिलो चरमा स्प्रेको काम विमानस्थलबाट सुरु गरेका छौँ, यात्रुहरू आउने जाने ठाउँलगायतका विभिन्न स्थानमा दैनिक औषधी छर्कनेछौँ,’ स्वास्थ्य मन्त्रालयका प्रवक्ता महेन्द्र श्रेष्ठले भने ।
यस्तै छिमेकी देशसँगका ३७ वटा नाकामा प्रदेश सरकार र पालिकाको सहकार्यमा हेल्थ डेस्क राखेर नेपाल भित्रने यात्रुको जाँच भइरहेको उनले बताए । अहिलेसम्म नेपालमा चार सय ४१ जनाको नमुना परीक्षण गर्दा एक जना बाहेक कसैमा पनि कोरोना नपाइएको मन्त्रालयले जनाएको छ । कोरोना भएका ती व्यक्ति पनि उपचारपछि पुरै निको भएर काममा फर्किएको मन्त्रालयको दाबी छ ।
भिडभाडमा नजाने, अत्यावश्यक काम नपरि घरबाहिर ननिस्कन, घर फर्किएपछि कम्तीमा २० सेकेण्ड साबुन पानीले मिचिमिची हात धुन, बिरामीको छेउमा जाँदा अनिवार्य मास्क लगाउन चिकित्सकले सुझाव दिएका छन् । खोक्दा र हाच्छ्युँ गर्दा नाक र मुख छोप्न तथा ज्वरो आउने, घाँटी दुख्ने र सास फेर्न गाह्रो हुने लक्षण देखिए स्वास्थ्य संस्थामा गइहाल्नुपर्ने सुझाव छ ।
कोरोना भाइरसका बिरामी अहिलेसम्म एक सय १५ देशमा भेटिएका छन् । कोरोना भाइरसका कारण अहिलेसम्म विश्वका विभिन्न देशमा चार हजार २७ जनाको ज्यान गएको छ ।
