सप्तरीको अग्निसाइर कृष्णसवरण गाउँपालिका–१ स्थित भवानीपुरकी ५५ वर्षीया मजादेवी सरदारको जंगली हात्तीको आक्रमणबाट मृत्यु भएको छ ।
भवानीपुरस्थित गिसा खोला जंगलमा गाई र बाख्रा चराउन गएकी उनी सोमबार बिहान मृत अवस्थामा फेला परेकी हुन् ।
बिहान बाख्रा चराउन गएकी उनी साँझसम्म पनि घरमा नआएपछि सरदारका आफन्तहरूले उनको खोजी गरेका थिए । आफन्तले सोमबार १० बजे मात्र जंगलमा उनको शव फेला पारेका थिए । शव फेला पर्नासाथ उनका आफन्तले प्रहरीलाई खबर गरेका थिए ।
उनको जंगली हात्तीको आक्रमणबाट मृत्यु भएको हुन सक्ने प्रहरी कार्यालय कञ्चनपुरले जानकारी दिए । साथै, इलाका प्रहरी कार्यालय सप्तरीले थप अनुसन्धान कार्य भइरहेको जनाए ।