काठमाडौं । निवर्तमान सञ्चारमन्त्री गोकुल बास्कोटालाई कारबाही गर्नुपर्ने मागसहति नेपाल विद्यार्थी संघ (नेविसंघ)ले काठमाडौंमा विरोध प्रदर्शन गरेको छ ।
नेविसंघ त्रिचन्द्र क्याम्पस इकाइले आइतबार बिहान क्याम्पस अगाडि प्रदर्शन गरेको हो ।
सरकारले भ्रष्टाचारलाई प्रश्रय दिएको र जनतालाई करको भार थोपरेको विद्यार्थी नेताहरुले आरोप लगाएका छन् ।
प्रदर्शनका क्रममा विद्यार्थी नेताहरुले सरकारविरुद्ध चर्का नाराबाजी गरेका थिए ।
नेविसंघले ललिता निवास जग्गा प्रकरणको निष्पक्ष छानबिन गर्न, इन्धन तथा पुस्तकमा लगाइएको अतिरिक्त कर खारेज गर्न र स्ववियु निर्वाचनको कार्यतालिका सार्वजनिक गर्न माग गरेको छ ।
सेक्युरिटी प्रिन्टिङ प्रेस खरिद गर्ने विषयमा कमिसनबारे कुरा गरेको अडियो टेप सार्वजनिक भएपछि बास्कोटाले गत फागुन ८ गते पदबाट राजीनामा दिएका थिए ।
उनले उक्त अडियो टेप बनावटी भएको दाबी गर्दै मिश्रविरुद्ध मानहानी र गालीबेइज्जतीको मुद्दा जिल्ला अदालत काठमाडौंमा दर्ता समेत गरेका छन् ।
