मार्तडी । लगातारको अविरल वर्षासँगै बूढीगङ्गा नदीमा आएको बाढीबाट विस्थापित भएका र मृतकका आफन्तलाई बाजुरा घर भई अमेरिकामा रोजगारीको सिलसिलामा काम गर्दै आएकाले राहतस्वरूप आर्थिक सहयोग गरेका छन् ।
अमेरिकामा बसोबास गर्नेहरुले आर्थिक संकलन गरेर बाजुराका बाढीपीडितलाई सहयोग गरेको जनक थापाले बताए । बाजुरालगायत सुदूरपश्चिम घर भई हाल अमेरिकाको विभिन्न राज्यमा बस्दै आएका ५६ जनाको सहयोगमा ६ लाख ६३ हजार २८० रुपैयाँ राहत संकलन गरेर पठाएको अमेरिकाको मेरिल्याण्ड राज्यमा बस्दै आएका पदमबहादुर शाहीले बताए ।
अमेरिकामा संकलन गरिएको रकम पत्रकार महासंघ बाजुराका अध्यक्ष प्रकाश सिंहको नाममा नेपाल पठाइसकेको शाहीले बताए । संकलित रकम जिल्ला विपद् व्यवस्थापन समितिको सहकार्यमा पीडितलाई हस्तान्तरण गरिने भएको छ । बाढी र पहिरोबाट घरबास विस्थापित भएका र मृत्यु भएका पीडितलाई नगद राहत उपलब्ध गराउन प्रमुख जिल्ला अधिकारीसँग बसेर टुङ्गो लगाइएको छ ।
प्रमुख जिल्ला अधिकारीसँगको समन्वयमा बडीमालिका नगरपालिकाका बाढीबाट विस्थापित भएका ३८ परिवारलाई आठ हजारका दरले तीन लाख चार हजार र बाढीमा बेपत्ता भएकी घागरकी ऐसेनी महतका आफन्तलाई २० हजार रुपैयाँ प्रदान गर्ने सहमति भएको छ । यस्तै गौमुल गाउँपालिकाका बाढीबाट विस्थापित परिवारलाई आठ हजारका दरले एक लाख ६० हजार, मृतक अनिश विकका आफन्तलाई २० हजार, बूढीनन्दाका विस्थापित सात परिवारलाई आठ हजारका दरले ५६ हजार र मृतक झिमु ल्वारका आफन्तलाई २० हजार रुपैयाँ दिने गरी समन्वय भएको हो ।
त्यस्तै पहिरोमा बूढीगङ्गा नगरपालिकाका धर्मराज पाध्यायको आफन्तलाई २० हजार, बाढीले बगाएकी हिमाली गाउँपालिकाका बालिका इशु नेपालीका आफन्तलाई २० हजार र पहिरोमा परी मृत्यु भएकी बालिका सीमा बुढाका आफन्तलाई २० हजार रुपैयाँ राहतस्वरुप नगद सहयोग गरिने प्रमुख जिल्ला अधिकारी कृष्ण गैरेले बताए ।
राहत संकलनमा मुख्य भूमिका निर्वाह गरेका पदमबहादुर शाहीले भने, ‘बाजुरा यसपटक बाढीपहिरोबाट निकै प्रभावित बन्यो, त्यसमा हाम्रो पनि सानो सहयोग होस् भन्ने उद्देश्यले अमेरिकामा सबैलाई अपिल गरेपछि सहयोग रकम पठाएका छौँ ।’ छोटो समयमा रु छ लाखभन्दा बढी रकम संकलन गर्न सफल भएको शाहीको भनाइ छ । ‘वास्तविक पीडितले राहत पाउन्, आगामी दिनमा पनि हाम्रो सहयोग जारी रहनेछ’, अमेरिकामा बस्दै आउनुभएका मनलाल जैशीले भने ।
यस्तै नेपाल घर भई हाल अमेरिका बस्दै आएका नेपाली महिलाले बाजुराका बाढीपीडितका लागि ५० हजार रुपैयाँ सहयोग गरेका छन् । सहयोग रकम जिल्ला आयुर्वेद स्वास्थ्य केन्द्र बाजुराका कार्यलय प्रमुख दीक्षा भण्डारीमार्फत पीडितलाई पठाइएको छ ।
अमेरिकाबाट आएको २५ हजार रुपैयाँ राहत गौमुल गाउँपालिका अध्यक्ष हरि रोकायामार्फत पीडितलाई पठाइएको छ । २५ हजार रुपैयाँ रकम भने बडिमालिका–२ घागरमा बाढीपहिराले घर जग्गा गुमाएकी एकल महिला लाली महतलाई घर निर्माणका लागि सहयोग गर्ने भण्डारीले जानकारी दिए । बाजुरामा असारयता बाढी र र पहिरोमा परेर एक बेपत्ता छन् भने पाँच जनाको मृत्यु भएको छ ।
बाढीपहिरोबाट जिल्लामा ७१ परिवार पूर्णरूपमा विस्थापित भएको जिल्ला प्रहरी कार्यलय बाजुराले जनाएको छ । बूढीगङ्गा नदीले एक बेलिबिज्र र पाँच झोलुङ्गे पुल बगाएको छ । नदीको किनारमा रहेका खेत जग्गा बगाएको छ । त्यस्तै ताप्रिसेरामा आएको बाढीले पक्की पुल बगाएको छ ।
