एम्नेस्टीमार्फत कुवेत सरकारको आश्रयस्थलमा शरण लिएर बसेका मध्ये २९९ जना नेपाली महिला कामदारहरु बिहीबार नेपाल आइपुगे ।
नेपाली राजदूतावास कुवेतकी सूचना अधिकारी जानकी ओझाका अनुसार दूतावासले उपलब्ध गराएको पहिलो प्राथमिकतामा १२ जना बच्चासहितको भनिए पनि कानुनी प्रकृया पूरा नभएको भन्दै बच्चा सहितका महिलाहरु जान पाएनन् ।
उनले भनिन् "हामीले कुवेत सरकारको आश्रय स्थलमा रहेका सबै नेपालीहरुको नामावली प्राथमिकता निर्धारण गरी सम्बन्धित निकायलाई दिएका छौँ । उहाँहरुले क्रमिकरुपमा पठाउने छन् । जहाँसम्म बच्चासहितका महिलाहरुको कुरा छ यहाँको कानुनी प्रकृया(क्लिरिएन्स)पूरा गरेर छिट्टै पठाइनेछ।"
यसैबीच, कुवेत सरकारको आश्रय स्थलमा आममाफी मार्फत २ हजार ९ सय ९१ जना (१ हजार ६ सय ८८ पुरुष र १ हजार ३ सय ३ जना महिला) नेपाल फर्कने उडान कुरेर बसेका छन् । उनीहरुलाई कुवेत सरकारले नि:शुल्क स्वास्थ्य परीक्षण र नि:शुल्क उडान मार्फत नेपाल पठाउने छ ।
यसैगरी, नेपाली राजदूतावास कुवेतका अनुसार आममाफीबाहेक पनि ४ हजारभन्दा बढीले घर जाने फारम भरेका छन । उनीहरुले भने उडान भाडा र उडानपूर्वको स्वास्थ्य परिक्षण शुल्क आफैँ ब्यहोर्नुपर्नेछ तर यसरी फर्कने उडान कहिले र स्वास्थ्य परीक्षण कहाँ र कति शुल्कमा गर्न सकिने भन्नेबारे पूर्ण विवरण भने अझै आसकेको छैन ।
