चुनावको मुखमा नेकपा एमालेलाई धोखा दिएर स्वतन्त्र उम्मेदवार बनी चुनाव जितेका प्रभु साहले दल खोलेका छन् ।
उनको दलको नाम आम जनता पार्टी राखिएको छ ।
साहको अध्यक्षतामा काठमाडौंमा बसेको विस्तारित बैठकले पार्टीको अन्तरिम विधान बनाएको छ । सँगसँगै साह अध्यक्ष रहेको ५१ सदस्यीय तदर्थ केन्द्रीय समिति गठन गरिएको छ ।
साहसँगै दलमा आबद्ध हुने भनिएका कांग्रेसका बागी सांसद अमरेशकुमार सिंह भने त्यसमा सरिक भएका छैनन् । वामपन्थी पृष्ठभूमिका साहसँग सिंहको मिलाप हुनेमा सुरुमै आशंका थियो ।
साहको पार्टीले प्रदेश अध्यक्ष, सचिव र इन्चार्जसमेत तोकेको छ ।
प्रदेश १ को इन्चार्जमा रामप्रित राम, अध्यक्षमा हरिप्रसाद पोखरेल, मधेस प्रदेशमा इन्चार्ज उपेन्द्र साह र अध्यक्षमा श्रीचन मुखिया, वाग्मती प्रदेशमा इन्चार्ज बद्रीप्रसाद न्यौपाने र अध्यक्षमा नाम्गेल मोक्तान, गण्डकी प्रदेश इन्चार्ज बद्रीप्रसाद न्यौपाने र अध्यक्षमा राजन यादवलाई जिम्मेवारी दिइएको छ ।
यस्तै लुम्बिनी प्रदेश इन्चार्जमा रितादेवी यादव, अध्यक्षमा परमानन्द बर्मा, कर्णाली प्रदेश इन्चार्ज उपेन्द्र साह र अध्यक्षमा सियाराम कुसवाह र सुदूरपश्चिम इन्चार्ज कुन्द्र कुसवाह र अध्यक्षको जिम्मेवारी केशव राय चौधरीलाई दिइएको छ ।
