अमेरिकी सहयोग परियोजना एमसीसीका कारण शेरबहादुर देउवा नेतृत्वको सरकार धरापमा पर्दै गएको छ ।
संसदबाट एमसीसी अनुमोदन नगरिएमा अहिलेको गठबन्धन टुट्ने निश्चित जस्तै भएको छ ।
एमसीसीको मामिलामा माओवादी केन्द्र र एकीकृत समाजवादीले भने समान धारणा बनाएका छन् । स्थानीय तहको निर्वाचनमा गठबन्धन कायम राख्नुपर्ने प्रस्ताव गरेका दुवै पार्टी गठबन्धन कायम राख्ने कि एमसीसीबाट बाहिर निस्कने भन्ने दोधारमा छन् ।
एमाले अध्यक्ष केपी शर्मा ओलीले अहिलेको सत्ता समीकरण टुटेमा एमसीसी पारित गर्न सहयोग गर्ने र सरकार पनि जोगाइदिने विश्वास प्रधानमन्त्री देउवालाई दिलाएका छन् । सोही कारण देउवाले पुष्पकमल दाहाल र माधवकुमार नेपाललाई दबाब दिन थालेका हुन् ।
दाहाल र नेपाल एमसीसी पारित गर्न तयार नभएमा यो समीकरण टुट्ने निश्चित छ ।
