नेकपा एकीकृत समाजवादीले स्थायी कमिटी, सचिवालय सदस्य र प्रदेश इन्चार्जहरू चयन गरेको छ । माधव नेपाल नेतृत्वको समाजवादीले राष्ट्रिय सम्मेलनबाट केन्द्रीय कमिटीलाई पूर्णता दिएर पदाधिकारी चयन नहुँदासम्मका लागि काम गर्न भन्दै जिम्मेवारी बाँडफाँट गरिएको हो ।
नेकपा एकीकृत समाजवादीको अन्तरपार्टी निर्देशिका (अपानी)मा उल्लेख भएअनुसार पार्टी अध्यक्ष माधव नेपाल र वरिष्ठ नेता झलनाथ खनाल सहित पहिले नेकपाको स्थायी कमिटीमा रहेकाहरूलाई नेकपा एकीकृत समाजवादीले स्थायी कमिटीमा राखेको हो । स्थायी कमिटीमा नेपाल र खनालसहित मुकुन्द न्यौपाने, डा. बेदुराम भुसाल र प्रमेश हमाल छन् ।
साथै पार्टीको दैनिक कार्य सम्पादन गर्नका लागि भुसालको संयोजकत्वमा प्रमेश हमाल, राजेन्द्र पाण्डे, डा. गंगालाल तुलाधर, डा. विजय पौडेल, जयन्ती राई र जीवनराम श्रेष्ठ रहेको सचिवालय गठन गरिएको छ । केन्द्रीय कार्यालय सचिवको जिम्मेवारी तुलाधरलाई दिइएको छ ।
प्रदेश १ को इन्चार्जमा घनेन्द्र बस्नेत, प्रदेश २ इन्चार्ज धर्मनाथ साह र बागमती प्रदेश इन्चार्जमा केदार न्यौपाने चयन भएका छन् । यसै गरी गण्डकी प्रदेश इन्चार्जमा केशवलाल श्रेष्ठ, लुम्बिनी प्रदेश इन्चार्जमा भागवत विश्वासी र कर्णाली प्रदेश इन्चार्जमा प्रकाश ज्वाला छन् । सुदूरपश्चिम प्रदेश इन्चार्ज भने तोकिएको छैन ।
उपत्यका विशेष प्रदेश इन्चार्ज विश्वनाथ प्याकुरेल, सम्पर्क विशेष प्रदेश इन्चार्ज विजय गुरुङ, मोर्चा इन्चार्ज डा. विजय पौडेल छन् । डा. विजय पौडेलले प्रचार विभाग प्रमुखको जिम्मेवारी पाउँदा श्रीप्रसाद शाहलाई प्रवास क्षेत्रको जिम्मा दिइएको छ ।
यसै गरी अदालत र निर्वाचन आयोग सम्बन्धी काम गर्ने जिम्मा राजेन्द्र पाण्डे, विजय पौडेल र रामकुमारी झाँक्रीलाई दिइएको छ । संसदीय कामको जिम्मेवारी भने विरोध खतिवडा, कल्याणी खड्का, जीवनराम श्रेष्ठ र ठगेन्द्र पुरीलाई तोकिएको छ ।
