एमाले विभाजन गरी नयाँ दल दर्ताको लागि निवेदन दिएको माधवकुमार नेपाल समूहले आफ्नो दलको नामबाट एमाले झिकेको छ । अब नेपाल अध्यक्ष रहेको पार्टीको नाम नेकपा (एकीकृत समाजवादी) रहने छ । यसअघि नेकपा एमाले समाजवादी नाम राखेर दल दर्ताको लागि निर्वाचन आयोगमा निवेदन दिए पनि आज १ बजे नाम सच्याउन माधव समूह आयोग पुगेका हुन् ।
आजै नेकपा एमालेका नेताहरू मिल्दो नाम दर्ता नगर्नू भन्दै आयोगमा पुगेर दबाब दिएपछि माधव नेपाल समूहले नाम दर्ताका लागि आयोग पुगेका हुन् । नेपाल कम्युनिष्ट पार्टी (एकीकृत समाजवादी) दर्ता आजै भइसकेकाे आयोगले जनाएकाे छ ।
निर्वाचन आयोगका प्रवक्ता राजकुमार श्रेष्ठले नेपाल फ्ल्याससँग भने-‘अस्ति आएर एउटा निवेदन दिनु भयो । यता एमालेले हाम्रो पार्टीसँग मिल्दो नाम भएको अर्काे पार्टी दर्ता नहोस् भनेर निवेदन दियो । त्यसपछि अघि १ बजे नाम नेकपा (एकीकृत समाजवादी) राखियोस् भनेर निवेदन आएकाे छ ।’
