पार्टी एकताको प्रयासस्वरूप नेकपा एमालेको दोस्रो तहका नेताहरूले अनौपचारिक छलफल तीव्र बनाएका छन् । आइतबारका लागि बोलाइएको केन्द्रीय कमिटी बैठक स्थगित गरेर विघटित कार्यदलका सदस्यहरूले आज सहमतिको प्रयास गर्ने भएका हुन् ।
यसअघि, नेपाल समूहले सङ्गठनात्मक गतिविधि रोक्न आग्रह गरे पनि एमाले संस्थापन पक्षले अस्वीकार गरेको थियो । शुक्रबार स्थायी कमिटी सदस्यहरूसहितको अनौपचारिक छलफलपछि प्रवक्ता प्रदीप ज्ञवालीले पार्टीको कुनै पनि नियमित काम नरोक्ने बताएका थिए ।
तर, माधव नेपाल पक्षका उपाध्यक्ष भीम रावलले शनिबार अध्यक्ष केपी शर्मा ओलीसँग भेट गरेपछि आजको केन्द्रीय कमिटी बैठक स्थगित भएको हो । १० बुँदे सहमति गरेको विघटित कार्यदलका सदस्यहरूबीच आइतबार पनि छलफल हुन लागेको हो ।
बिहीबार र शुक्रवार बसेको नेपाल पक्षको केन्द्रीय कमिटी बैठकले १० बुँदेलाई आधार मानेर एकता गर्ने निर्णय गरेको थियो ।
पार्टी एकता गर्ने माधव नेपाल पक्षको निर्णयलाई सकारात्मक भन्दै दोस्रो तहका नेताहरूले छलफल गर्न लागेका हुन् ।
कार्यदलका एक सदस्यले आफूहरू निरन्तर छलफलमा रहेको र आज भेटेरै कुरा गर्ने तयारी भएको बताए । विधान अधिवेशनको तयारीका विषयमा छलफल गर्न एमाले संस्थापन पक्षले आजका लागि राखेको बैठक भोलिसम्मका लागि स्थगित भएको छ ।
सरकारले पूर्ववर्ती सरकारको निर्णय उल्ट्याउने काम गरिरहेका वेला सङ्गठनात्मक गतिविधि रोक्न नसकिने एमाले संस्थापन पक्षले बताएको छ । संस्थापन पक्षले महाधिवेशन तयारीलगायत विषयमा छलफल गर्न २४ साउनमा केन्द्रीय कमिटी बैठक बोलाएको हो । विधान महाधिवेशनबाट संशोधन गर्नुपर्ने विधानका विभिन्न पक्षबारे प्रारम्भिक छलफल सुरु भएको नेताहरू बताउँछन् ।
