काठमाडौं । संसदमा प्रधानमन्त्री शेरबहादुर देउवाले विश्वासको मत पाएसँगै माधव नेपाल समूह सरकारमा सहभागी हुन्छ कि हुँदैन भन्ने आमचासो छ ।
प्रधानमन्त्री देउवाले गठबन्धनमा सामेल राजनीतिक दलहरूलाई समेटेर मन्त्रिमण्डल विस्तार गर्ने तयारी समेत गरिरहेका छन् ।
यसैबीच नेकपा एमालेका वरिष्ठ नेता माधव कुमार नेपाल समूह तत्काल सरकारमा सहभागी नहुने भएको छ ।
नेपाल समूहले प्राविधिक कारणले सरकारमा सहभागी हुन नसक्ने बताएको छ ।
आज (मंगलबार) बिहान माओवादी केन्द्रका अध्यक्ष पुष्पकमल दाहाल प्रचण्ड र जनता समाजवादी पार्टीका अध्यक्ष उपेन्द्र यादवले एमाले नेता माधव नेपाललाई भेटेर सरकारमा सहभागी हुन आग्रह गरेका थिए ।
भेटवार्तामा साझा कार्यक्रम बनाएर सरकार सञ्चालन गर्नेबारेमा समेत छलफल भएको थियो ।
प्रचण्डले सोही विषयमा मंगलबारै प्रधानमन्त्री देउवासँग समेत बालुवाटार पुगेर छलफल गरेका छन् । उक्त भेटमा प्रधानमन्त्री देउवा र अध्यक्ष प्रचण्डबीच साझा कार्यक्रम बनाएर प्रभावकारी ढंगले सरकार सञ्चालन गर्न दुवै नेता सहमत भएका थिए ।
आफ्नो समूहले संसद् जोगाउन प्रधानमन्त्रीको विश्वासको मतको पक्षमा मतदान गरे पनि अहिले नै सरकारमा जान सक्ने अवस्था नरहेको माधव निकट एक नेताले बताए ।
