नेपाल कम्युनिस्ट पार्टी (माओवादी केन्द्र) को वैधानिकतालाई चुनौती दिँदै दल दर्ता खारेजीको मागसहित निर्वाचन आयोगमा निवेदन दिएका पूर्वमाओवादीका नेताहरु आज फेरि आयोग जाँदै छन् । माओवादी छाडेर एमालेमा लागेका पूर्वमाओवादी नेताहरु आफ्नो उजुरी फलोअपको लागि निर्वाचन आयोग जान लागेका हुन् ।
टोपबहादुर रायमाझीको नेतृत्वमा पूर्वमाओवादी नेताहरु प्रभु साह, मणि थापा र गौरीशंकर चौधरी निर्वाचन आयोग जान लागेका हुन् । लेखराज भट्ट भने बिरामी भएका जान नसक्ने पूर्व माओवादी गौरीशंकर चौधरीले जानकारी दिए ।
पूर्वमाओवादी नेता साह, रायमाझी, भट्ट र चौधरी माओवादी केन्द्रबाट प्रत्यक्ष निर्वाचित प्रतिनिधिसभा सदस्य हुन् । उनीहरु दलबदल गरी नेकपा एमालेमा प्रवेश गरेपछि माओवादी पार्टीले कारबाही गरेको थियो । माओवादीबाट कारबाही परेसँगै उनीहरूको सांसद पद खारेज भएको थियो । उनीहरूले आफूमाथि गरिएको कारबाही अवैधानिक रहेको मात्र नभई माओवादी केन्द्र नै अवैधानिक रहेको दाबी अधिवक्ता बुढाथोकीका नामबाट दर्ता भएको निवेदनमार्फत गरेका थिए ।
यद्यपि, अहिले प्रतिनिधिसभा विघटन भइसकेको छ । तर, पुनर्स्थापना भएमा पदमै बहाल रहन पाउने भन्दै उनहिरु आयोगमा उजुरी दिन गएका हुन् ।
संविधानमा कम्तिमा पाँच वर्षमा एकपटक राजनीतिक दलको महाधिवेशन हुनुपर्ने व्यवस्था छ । तर, माओवादी केन्द्रले २०६९ सालयता महाधिवेशन आयोजना नगरेका निवेदकको दाबी छ ।
माओवादी केन्द्रले एमालेमा प्रवेश गरेबापत कारबाही गरेका सांसदहरूका पक्षबाट आयोगमा निवेदन दिइएको हो । उनीहरूले आफूमाथि गरिएको कारबाही अवैधानिक रहेको मात्र नभई नेपाल कम्युनिस्ट पार्टी (माओवादी केन्द्र) नै अवैधानिक रहेको दाबी अधिवक्ता बुढाथोकीका नामबाट दर्ता भएको निवेदनमार्फत गरेका छन् ।
हालको नेकपा माओवादी केन्द्र पहिलोपटक २०६४ सालमा नेपाल कम्युनिस्ट पार्टी (माओवादी)का रुपमा दर्ता भएको र २०६५ मा यसको नाम परिवर्तन गरी एकीकृत नेकपा माओवादी बनाइएको पनि निवेदनमा उल्लेख छ ।
२०६९ माघ २० देखि २६ सम्म सो पार्टीको महाधिवेशन सम्पन्न भएको र १०१ सदस्यीय केन्द्रीय कमिटी गठन गरिएको उल्लेख गर्दै निवेदनमा सो पार्टीले निर्वाचन आयोगमा पेस गरेको विधानमा पाँच वर्षमा केन्द्रीय महाधिवेशन गर्ने उल्लेख रहेको पनि स्मरण गराइएको छ ।
