नेपाल ट्रेड युनियन महासंघ जिफन्टको बागमती प्रदेश कमिटीले सिन्धुपाल्चोकको हेलम्बु र मेलम्चीका बाढी पीडितको आवास पुन निर्माणमा स्वयंसेवी खटाउने भएको छ । जिफन्ट बागमती प्रदेशका अध्यक्ष रामहरी नेपालले विज्ञप्ति जारी गर्दै बाढी पहिरो पीडितको निजी आवास पुन निर्माणमा जनशक्ति खटाउने जानकारी दिए ।
स्वयंसेवीका रुपमा दक्ष जनशक्ति खटाउन आफूहरू तयार रहेको बताउँदै अध्यक्ष नेपालले उद्धार र राहत वितरणमा पनि स्वयंसेवक खटाइने जानकारी दिए ।
अध्यक्ष नेपालले हेलम्बुसहितका क्षेत्रमा राहत पुग्नै नसकेको बताउँदै सहज स्थानमा राहत वितरणमा भइरहेको होडबाजी रोक्न पनि माग गरे । एक द्वार नीतिबाट सबै पीडितको घर घरमा राहत पुर्याउनुपर्ने बताउँदै अध्यक्ष नेपालले त्यसका लागि आवश्यक जनशक्ति खटाउन आफूहरू तयारी अवस्थामा रहेको बताएका छन् ।
मेलम्ची खानेपानी आयोजनामा कार्यरत स्वदेशी तथा विदेशी श्रमिकहरू, माछापालन तथा कृषि फर्ममा कार्यरत श्रमिकहरू र अन्य स्थानीय क्षेत्रमा कार्यरत श्रमिकको जीवन रक्षाका लागि आवश्यक ध्यान दिन पनि जिफन्ट बागमतीले सरकारसँग माग गरेको छ ।
बाढीले विद्युत् लगायत सञ्चार प्रविधि नष्ट गरेकाले यथासम्भव चाँडो अत्यावश्यकता सेवा सञ्चालन गर्न पनि जिफन्ट बागमतीले सरकारसँग माग गरेको छ ।
सडक तथा बाटो कटान भएको कारण हेलम्बु गाउँपालिकाको चनौटे, ग्याल्थुम र किउल सम्म सहज ढङ्गले खाद्यान्न तथा अन्य राहत पुर्याउन सकिने अवस्था नरहेकाले प्रशासनले अनुमति दिए ती स्थानमा स्वयंसेवक तत्काल पठाउने तयारी भएको पनि अध्यक्ष नेपालले जानकारी दिए ।जनफन्टसँग दक्ष जनशक्तिसहितको टिम रहेकाले आफूहरू देशको जुनसुकै स्थानमा आइपर्ने विपद् व्यवस्थापनमा तयार रहेको अध्यक्ष नेपालले बताए । जिफन्ट एमाले सम्बद्ध श्रमिकहरूको सङ्गठन हो ।
