नेपालगञ्जस्थित भेरी अस्पतालमा कार्यरत स्वास्थ्यकर्मीमाथि आक्रमण गर्ने कानुअनुसार कारवाही गर्न नेकपा माओवादीका अध्यक्ष प्रच्णडले माग गरेका छन् । गएराति स्वासथ्यकर्मीमाथि आक्रमण भएपछि अध्यक्ष प्रचण्डले यस्ताे माग गरेका हुन् ।
गत जेठ ४ गते अस्पतालमा भर्ना भएका दाङका कोरोना सङ्क्रमित बिरामी अवस्था गम्भीर भएपछि चिकित्सकले भेन्टिलेटरमा राखेर उपचार गर्ने क्रममा गएराति करिब ८ बजे मृत्यु भएपछि आफन्तले स्वास्थ्यकर्मीमाथि आक्रमण गरेको थियो ।
मृतकका आफन्तले डा चन्द्रप्रकाश साहु र नर्सहरू अस्मिनी गुरुङ र सदीक्षा गैरैमाथि हातपात गरेका थिए । मृतकका छोरा र दुई भाइले ड्युटीमा रहेका चिकित्सक साहु र नर्समाथि हातपातको प्रयास गरेपछि तनाव भएको थियो । बिरामीको मृत्युपछि आक्रोशित आफन्तले स्वास्थ्यकर्मीमाथि आक्रमण गर्नुका साथै अस्पतालको आइसीयूकक्षमा तोडफोड समेत भएकाे छ ।
ड्युटीमा खटिएका बेला आफूमाथि हातपात भएपछि अस्पतालभित्र स्वास्थ्यकर्मीको भागाभाग भएको र चार नर्सिङ स्टाफ र एक चिकित्सक घाइते भएका छन् । साथै उनीहरूले एक तलामाथिबाट हाम फालेर ज्यान जोगाएका थिए ।
