प्रधानमन्त्री केपी शर्मा ओलीले विश्वासको मत लिने दिन नजिकिँदै गर्दा राजनीतिक दलहरूको दौडधुप तीव्र भएको छ । प्रमुख प्रतिपक्षी नेपाली काँग्रेस, माओवादी केन्द्रलगायत दलहरू जसरी हुन्छ प्रधानमन्त्री ओलीलाई विश्वासको मत लिनबाट असफल बनाउने प्रयासमा जुटेका छन् ।
काँग्रेसले पदाधिकारी बैठकमार्फत नै प्रधानमन्त्री ओलीलाई विश्वासको मत नदिने प्रस्ट पारिसकेको छ भने माओवादी केन्द्रले सरकारलाई दिएको समर्थन फिर्ता लिएको छ ।
काँग्रेस र माओवादी केन्द्रका नेताहरू अरू विपक्षी दललाई समेत आफ्नो कित्तामा ल्याउने प्रयासमा सक्रिय भएका छन् । अविश्वासको मतका लागि नेपाली काँग्रेस, माओवादी केन्द्र, जनता समाजवादी पार्टी र एमालेको खनाल नेपाल समूह आन्तरिक छलफलमा जुटिरहेका छन् ।
यसैबिच, एमालेभित्रको आन्तरिक द्वन्द्व कारण प्रधानमन्त्री केपी शर्मा ओलीले विश्वासको मत लिन सक्ने वातावरण कमजोर बन्दै गएको छ । पार्टीलाई २०७५ सालको जेठ २ गतेको अवस्थामा फर्काउनुपर्ने खनाल नेपाल समूहको अडान रहेको छ भने प्रधानमन्त्री एवम् पार्टी अध्यक्ष केपी शर्मा ओली कुनै पनि हालतमा पछि हट्न नसक्ने अडानमा हुनुहुन्छ । उनीहरूको अडानले नेकपा एमाले विभाजन उन्मुख भएको छ ।
शीर्ष नेताहरू आआफ्नै अडानमा रहेकै समयमा दोस्रो तहका नेताहरू समाधानका लागि पटक पटक छलफलमा जुटे पनि समस्याको निकास निस्कन सकेको छैन ।
हिजो मात्रै एमाले अध्यक्ष ओली समूहका नेताहरू ईश्वर पोखरेल, विष्णु पौडेल, सुवास नेम्वाङ, विष्णु रिमाल र नेपाल समूहबाट सुरेन्द्र पाण्डे, घनश्याम भुसाल, योगेश भट्टराई र गोकर्ण विष्टबिच छलफल भएको थियो ।
प्रधानमन्त्री ओलीले पर्सि सोमवार प्रतिनिधिसभाको विशेष अधिवेशनमार्फत विश्वासको मत लिँदै छन् ।