नेकपा माओवादी केन्द्रले सरकारका समर्थन फिर्ता लिएको जानकारी सङ्घीय संसद सचिवालयलाई गराएको छ । मङ्गलवार स्थायी कमिटी बैठकबाट समर्थन फिर्ता लिने निर्णय गरेको माओवादी केन्द्रले आज संसदलाई जानकारी गराएको हो । सदनलाई जानकारी गराउन प्रमुख सचेतक देव गुरुङ सङ्घीय संसदका महासचिव गोपालनाथ योगीको कार्यकक्षमै पुगेका थिए ।
प्रधानमन्त्री केपी शर्मा ओलीले वैशाख २७ गते विश्वासको मत लिने प्रयोजनका लागि राष्ट्रपतिबाट प्रतिनिधिसभाको विशेष अधिवेशन आह्वान भइसकेका बेला मङ्गलवार माओवादीले समर्थन फिर्ता लिने निर्णय गरेको थियो । यसअघि समर्थन फिर्ता लिन प्रधानमन्त्री ओलीले माओवादीलाई पटक पटक चुनौती दिए पनि फेरि संसद विघटन हुनसक्ने खतरा देखेर फिर्ता लिएको थिएन । यससँगै ओली सरकार अल्पमतमा परेको छ ।