काठमाडौं ।नेकपा माओवादी केन्द्रले पुन: आफ्ना चार सांसदलाई पदमुक्त गरेको छ ।
प्रधानमन्त्री केपी शर्मा ओली नेतृत्वको एमाले पार्टीमा प्रवेश गरेका प्रदेश २का चार सांसदलाई नेकपा माओवादी केन्द्रले पदमुक्त गरेको हो । पदमुक्त हुनेहरुमा रामचन्द्र मण्डल, कुन्दनप्रसाद कुशवाहा, ज्वाला साह र मोहम्मद समिर छन् । उनीहरु नेकपा एमाले र नेकपा माओवादी मिलेर बनेको नेकपा खारेज गरेसँगै एमाले धारमा लागेका थिए ।
पार्टी विधानविपरीत गएकाले राजनीतिक दलसम्बन्धी ऐन २०७३ को दफा ३१ र ३२ (१) ख बमोजिम पार्टीका अध्यक्ष पुष्पकमल दाहाल प्रचण्डले चारैजनालाई कारबाही गरी सभामुखसमक्ष पठाएका थिए । चार सांसद नेकपा एमालेमा लागेपछि पार्टीको केन्द्रीय समितिले स्पष्टीकरण सोधेको थियो ।
२४ घण्टाभित्र स्पष्टीकरण दिन भनिए पनि उनीहरुले नदिएपछि उनीहरुलाई पदमुक्त गर्न सिफारिस गरिएको थियो । माओवादी केन्द्रको प्रदेशसभामा प्रतिनिधित्व गर्ने ११ जना प्रदेशसभा सदस्यहरु थिए ।
