काठमाडौं । कैलालीको धनगढीमा प्रधानमन्त्री तथा नेपाल कम्युनिष्ट पार्टी (एमाले) अध्यक्ष केपी शर्मा ओलीको पुत्ला जलाइएको छ । सोही पार्टी नेकपा एमाले माधवकुमार नेपाल समूहका युवा संघ नेपालका नेता तथा कार्यकर्ताले मंगलबार धनगढीमा प्रधानमन्त्री ओलीको पुत्ला जलाएका हुन् ।
प्रम ओलीले आफ्नै पार्टीका नेता माधव नेपाल र भीम रावललाई पार्टीबाट निलम्बन गरेको विरोधमा उनीहरूले पुत्ला जलाएको बताइएको छ । ओलीले केही दिन अगाडि मात्रै यी दुई नेतालाई पार्टी सदस्यबाट ६ महिनाको लागि निलम्बन गरेका छन् ।
युवा संघ सुदूरपश्चिमका अध्यक्ष बाबुराजा श्रेष्ठले ओलीको अवैधानिक कार्यको विरोध गरिएको बताए। पुत्ला दहनपछि युवा संघका कार्यकर्ताले ओलीविरुद्ध नाराबाजी गरेका थिए।
