सरकारसँग तीनबुँदे सहमति भएपछि नेपाल कम्युनिस्ट पार्टीका महासचिव नेत्रविक्रम चन्द 'विप्लव' प्रहरी सुरक्षासहित संघीय राजधानी काठमाडौं आइपुगेका छन् । उ
सरकार र विप्लव नेतृत्वको नेपाल कम्युनिस्ट पार्टीबीच राजधानीमा वार्ता सफल भएपछि तीन वर्षदेखि भूमिगत 'विप्लव' काठमाडौं आइपुगेका हुन् । सरकारी वार्ता टोलीका सदस्य डा. राजन भट्टराईका अनुसार आज दिउँसो २ बजे काठमाडौंको राष्ट्रिय सभागृहमा आयोजित एक समारोहमा प्रधानमन्त्री केपी शर्मा ओली र विप्लवले सहमतिपत्रमा हस्ताक्षर गरी त्यसलाई सार्वजनिक गर्ने कार्यक्रम छ ।
यससँगै विप्लव औपचारिक रुपमा सार्वजनिक भई शान्तिपूर्ण राजनीति सुरु गर्नेछन् । सरकारले २०७५ फागुन २८ गते 'विप्लव' समूहमाथि प्रतिबन्ध लगाएपछि विप्लव कुनै पनि सार्वजनिक कार्यक्रममा सहभागी भएका छैनन् ।
'विप्लव' समूह शान्तिपूर्ण राजनीतिमा आउन सहमत भएपछि सरकारले उक्त समूहमाथि लगाएको प्रतिबन्ध हटाइसकेको छ । प्रतिबन्दा हटाएसँगै कार्यकर्ताहरू पनि रिहा हुन थालेका छन् ।