प्रतिनिधिसभा विघटनपछि नेकपा दुई समूहमा विभाजित भयो । पहिलो अध्यक्ष केपी शर्मा ओली पक्ष र अर्काे अध्यक्ष पुष्पकमल दाहाल (प्रचण्ड) पक्षमा नेता कार्यकर्ता विभाजित छन् । कार्यकर्ताको त कुरै छाडौँ लामो समयदेखि सँगै रहेका नेता अलग–अलग समूहमा भए । दशकौँ लामो समय सँगै खाँदै, बस्दै  राजनीति गरेका नेता हाल अलग भएपछि एक अर्काप्रति आरोपप्रत्यारोपमा उत्रिएका छन् । 

पछिल्लो उदाहरण हो, नेकपाको एउटा समूहको नेतृत्व गर्दै आएका अध्यक्ष प्रचण्ड विगतमा उनीसँगै सहकार्य गरेका, तर हाल ओली पक्षमा रहेका उद्योगमन्त्री लेखराज भट्टमाथि खनिए । 

भट्टकै गृह जिल्ला कैलालीमा पुगेर प्रचण्डले उनलाई ‘दलाल’ भने । भट्ट तिनै नेता हुन् जसले २०३८ सालदेखि प्रचण्डलाई  नजिकबाट साथ दिएका थिए । तर, अहिले संसद् विघटनसँगै ओली समूहका लागेका छन् ।

अध्यक्ष प्रचण्डले आफूले हुर्काएर मन्त्री बनाएको मान्छे ओलीको वरिपरि घुम्ने भएको भन्दै नेता भट्टलाई दलालको पनि दलाल भएको आरोप लगाए । प्रचण्डले भने, ‘मैले नै हुर्काएर मन्त्री बनाएको मान्छे, अब उनी केपीको वरिपरि घुम्ने भए, केपी ओली आफैँ दलाल हुन्, उनी (लेखराज भट्ट) दलालको पनि दलाल भए, पत्याइनसक्नुभयो । तर, ९५ प्रतिशत सुदूरपश्चिमका जनता हिलेका छैनन् । उनीहरुले दलालको भण्डाफोर गरेका छन् ।’

यसरी, आफूसँगै चारदशक सँगै रहेर सहकार्य गरेका, त्यसबीचमा सँगै जनयुद्ध लडेका भट्टलाई दलाल भनेपछि प्रचण्डको चौतर्फी विरोध भइरहेको छ । भट्टले गुट परिवर्तन गरेकै कारणले दलालको उपाधि पाएको भन्दै प्रचण्ड समूहकै नेता कार्यकर्ताले आलोचना गरिरहेका छन् । प्रचण्डको अभिव्यक्तिपछि सामाजिक सञ्जालमा भट्टले प्रचण्डलाई मोटरसाइकलमा पछाडि राखेर गन्तव्यमा जाँदै गरेको तस्वीर भाइइरल भएको छ । क्याप्सनमा धेरैले आफूसँग हुँदा ‘नायक’ हुने र गुट परिवर्तन गर्नेबित्तिकै दलाल र गद्धार हुने भन्दै प्रचण्डको आलोचना गरेका छन् ।

जनयुद्ध लड्ने प्रचण्डका सारथिहरु मोह वैद्य, नेत्रबिक्रम चन्द (विप्लव), रामबहादुर थापा (बादल), लेखराज भट्ट, मणि थापा, प्रभु शाह, टोपबहादुर रायमाझीलगायत नेता अहिले प्रचण्डसँग छैनन् । उनीहरुसँग जोडिएका जनमुक्ति सेना, सहिद परिवार, घाइते अपांग, बेपत्ता परिवार, युद्धमा लडेका नेता कार्यकर्ताले प्रचण्डको साथ छाडिसकेका छन् । यसकारण ती सबै दलाल र गद्धार हुन् त भन्दै व्यांग्य गरिएका पोष्टले सामाजिक सञ्जालका भित्ता रंगिएका छन् ।

०६३ को असार पहिलो हप्ता डोटीको विपिनगरमा माओवादीले प्रशिक्षण कार्यक्रम राखेको थियो । प्रशिक्षणपछि अत्तरियास्थित भट्टको घरमा आउँदै गर्दा भट्टले चलाएको मोटरसाइकलपछाडि प्रचण्ड बसेका थिए । सोही क्रममा पत्रकार भोजराज भाटले तस्वीर खिचेका थिए । शनिबार प्रचण्डले भट्टलाई दलाल भनेपछि उही १४ वर्षअघि खिचिएको तस्वीर सामाजिक सञ्जालमा एकाएक भाइरल भएको  हो ।

अघिल्लो रात अर्कै घरमा प्रचण्डलाई सुरक्षित सेल्टरको व्यवस्था गरेका भट्टले बिहानै आफ्नो मोटरसाइकलमा घरमा ल्याउँदै गर्दा आफूले उक्त तस्वीर क्यामरामा कैद गरेको भाटले जानकारी दिए । 

सामाजिकसञ्जालमा यस तस्वीरको विषयमा वास्तविकता नबुझी अनेक टिप्पणी गरेको देख्दा आफूलाई दु:ख लागेको पत्रकार भाटले बताए । कतिपय सञ्चारमाध्यमले आफूलाई क्रेडिट नदिई फेटो प्रकाशन गरेको भन्दै उनले असन्तुष्टि जनाएका छन् । 

उनी भन्छन्, ‘०६३ को असार पहिलो हप्ता, डोटीको विपिनगर प्रशिक्षणपछि अत्तरियास्थित लेखराज भट्टको घरमा आउँदै गरेको तस्वीर हो यो । अघिल्लो रात अर्कै घरमा प्रचण्डलाई सुरक्षित सेल्टरको व्यवस्था गरेका भट्टले सुटुक्कै आफ्नो मोटरसाइकलमा घरमा ल्याउँदै गर्दा मैले उक्त तस्वीर कैद गरेको थिए । अहिले यो तस्वीर सामाजिक सञ्जालमा जहीँतहीँ भाइरल भइरहेको छ, आआफ्नै तवरमा यसको विश्लेषण गरिएको छ । तर, वास्तविकता अर्कै छ । मेरो क्रेडिट कहीँ देख्दिनँ, यसमा मेरो घोर आपत्ति छ ।’