काठमाडौं । प्रधानन्यायाधीश चोलेन्द्र शमशेर जबराले प्रतिनिधि सभा विघटनविरुद्ध परेको रिटको सुनुवाइका लागि गठित संवैधानिक इजलासमा न्यायाधीश सपना मल्ल प्रधानलाई राखेका छन् ।
यसअघि इजलासमा रहेका न्यायाधीश हरिकृष्ण कार्की कन्फिल्ट अफ इन्ट्रेटको विषय उठेपछि बाहिरिएका थिए ।
प्रधानन्यायाधीश जबराले इजलासमा अन्य भने पुरानै न्यायाधीशलाई निरन्तरता दिएका छन् । ती न्यायाधीश हुन्, विश्वम्भरप्रसाद श्रेष्ठ, अनिलकुमार सिन्हा र तेजबहादुर केसी ।
न्यायाधीश प्रधानका विषयमा पनि कानुन व्यवासायीले प्रश्न उठाउन सक्ने छन् ।
प्रधान पहिलो संविधानसभामा तत्कालीन नेकपा एमालेतर्फबाट सांसद भएकी थिइन् ।
केपी शर्मा ओली २०७२ सालमा पहिलोपटक प्रधानमन्त्री हुँदा वर्तमान न्यायाधीश कार्की महान्यायाधिवक्ता थिए ।
उनलाई संवैधानिक इजलासमा राखिएपछि संसद् विघटनविरुद्ध बहस गर्ने कानुन व्यवसायीले प्रश्न उठाएका थिए ।
त्यसैले उनी गत बुधबार इजलासबाट बाहिरिएका हुन् ।
