काठमाडौं । बागमती प्रदेशका मुख्यमन्त्री डोरमणि पौडेलले नेकपा संसदीय दलका उपनेता शालिकराम जमरकट्टेल र सचेतक बुद्धिमान माझीलाई पदबाट हटाएका छन् ।
आज (मंगलबार) मुख्यमन्त्री पौडेलले उनीहरुलाई हटाएका हुन् ।
प्रदेश सरकाविरुद्ध अविश्वास प्रस्ताव दर्ता गराउन भूमिका खेलेको भन्दै मुख्यमन्त्री पौडेलले उनीहरुलाई पदबाट हटाएका हुन् ।
बाग्मती प्रदेशका मुख्यमन्त्री पौडेल नेकपा केपी शर्मा ओली समूहका हुन् भने जम्मकट्टेल र माझी प्रचण्ड–नेपाल समूहका हुन् ।
मुख्यमन्त्री पौडेलविरुद्ध केही दिनअघि अविश्वासको प्रस्ताव दर्ता गरिएको थियो ।
स्पष्टिकरण समेत सोधे
पौडेलले अविश्वासको प्रस्तावमा हस्ताक्षर गर्ने ४५ मध्ये ३० सांसदलाई स्पष्टिकरण समेत सोधेका छन् ।
मुख्यमन्त्रीका प्रेस सल्लाहकार प्रकाश दाहालले पहिलो चरणमा ३० जना सांसदहरुसँग स्पष्टिकरण सोधिएको जानकारी दिए ।
नेकपाको दाहाल–नेपाल समूहका ४५ प्रदेशसभा सदस्यले १० पुसमा मुख्यमन्त्री पौडेलविरुद्ध अविश्वास प्रस्ताव दर्ता गराएका थिए ।
वाग्मती प्रदेशमा नेकपाको कुल ८० सांसदमध्ये प्रधानमन्त्री ओलीको पक्षमा ३४ र दाहाल–नेपाल पक्षमा ४६ सांसद छन् ।
