काठमाडौं । संवैधानिक परिषद्सम्बन्धी अध्यादेश जारी भएपछि नेकपामा विवाद थप चर्किएको छ ।
ओली विरोधी पाँच सचिवालय सदस्यहरुको बैठक पुष्पकमल दाहाल प्रचण्ड निवास खुमलटारमा बस्दैछ ।
माधव नेपाल, झलनाथ खनाल, बामदेव गौतम, नारायणकाजी श्रेष्ठ लगायतका नेताहरु खुमलटारमा जम्मा भएका हुन् ।
राष्ट्रपति विद्यादेवी भण्डारीले मंगलबार संवैधानिक परिषद् (काम, कर्तव्य, अधिकार र कार्यविधि) सम्बन्धी अध्यादेश जारी गरेकी छन् ।
संवैधानिक परिषदमा निर्णय गर्न सहज हुन सक्ने गरी अध्यादेश ल्याइएको हाे । जारी अध्यादेशअनुसार अब संवैधानिक परिषद्को बैठकले बहुमतबाट निर्णय गर्न सक्नेछ ।
परिषदमा ६ जना सदस्य रहने प्रावधान छ । उपसभामुख पद रिक्त रहेकाले अहिले ५ जना सदस्य छन् । ५ जनामध्ये चारजना बैठकमा उपस्थित भए पनि निर्णय गर्न सक्ने गरी अध्यादेश ल्याइएको हाे ।
मन्त्रिपरिषद्को सिफारिशमा आज राष्ट्रपति विद्यादेवी भण्डारीले जारी गरेको अध्यादेशले सो प्रावधान संशोधन गरेको राष्ट्रपतिका प्रेस सल्लाहकार टिकाप्रसाद ढकालले बताए ।
मंगलबार बिहान सभामुख अग्निप्रसाद सापकोटाको अनुपस्थितिका कारण परिषद बैठक स्थगित भएपछि प्रधानमन्त्री केपी शर्मा ओलीले आकस्मिक रुपमा मन्त्रिपरिषद बैठक बोलाएका थिए ।
