काठमाडौं ।स्वास्थ्य तथा जनसंख्या मन्त्री भानुभक्त ढकाललाई प्रतिनिधिसभाको सार्वजनिक लेखा समितिले स्वास्थ्य सामग्री खरिद प्रक्रियामा भएका अनियमितताबारेमा छलफलका लागि बोलाउने भएको छ ।
कोरोना महामारी रोकथाम तथा नियन्त्रणका लागि स्वास्थ्य तथा जनसंख्या मन्त्रालय मातहतका निकाय र नेपाली सेनामार्फत् स्वास्थ्य सामग्री ल्याउँदा भएका अनियमितता विषयमा छलफलका लागि समितिले मन्त्री ढकाललाई बोलाउने भएको हो ।
समितिले यसअघि मन्त्रालयले खरिद प्रक्रिया पूरा नगरिकन ओम्नी समूहमार्फत स्वास्थ्य सामग्री खरिद गर्न लागेको भन्दै अध्ययन सुरु गरेको थियो । यद्यपि लामो समय समितिको बैठक बस्न नसक्दा सो विषय उठ्न सकेको थिएन ।
समितिका सचिव डा. रोजनाथ पाण्डेका अनुसार लामो समय बैठक बस्न नसक्दा सो विषयमा छलफल हुन नसकेको हो । ‘अबको बैठकमा स्वास्थ्य मन्त्री ढकाललाई बोलाएर छलफल गर्ने तयारी समितिले गरेको छ,’ उनले भने, ‘समितिको बैठक लामो समय नबस्दा उजुरीको संख्या पनि बढेको छ । अहिलेसम्म एक दर्जन बढी उजुरी परेको छ ।’
विशेष गरी सार्वजनिक खरिद ऐनलाई कार्यान्वयन गर्ने शिलशिलामा भएका अनियमितताका कुराहरुलाई लिएर उजुरी परेको छ । सडक निर्माण, विद्युत प्राधिकरण मार्फत हुने ठेक्काको विषय लगायतका विषयमा उजरी परेको छ ।