काठमाडौं । प्रदेश २ का मुख्यमन्त्री लालबाबु राउतले ‘प्रहरी मेरो साथी’ हो भन्ने कुरा जनताले अनुभूति गर्न सक्नुपर्ने बताएका छन् ।
६५औं प्रहरी दिवसको अवसरमा प्रदेश- २ प्रहरी कार्यालयले आयोजना गरेको कार्यक्रममा उनले यस्तो बताएका हुन् । ‘प्रहरी मेरो साथी हो भन्ने कुरा प्रहरीको व्यबहार र चरित्रमा देखिनुपर्छ,’ मुख्यमन्त्री राउतले भने ।
प्रदेशमा पछिल्लो समय आपराधिक घट्ना वृद्धि भएको बताउँदै उनले पीडितले न्याय पाउन ढिलो भइरहेको बताए । जसका कारण अपराधीको मनोबल बढ्दै गएको उनको भनाइ थियो ।
‘महिला हिंसा, महिला तथा बालिका बलात्कार बढेको छ । दलितमाथिको हिंसा पनि बढेको छ,’ मुख्यमन्त्री राउतले भने, ‘प्रहरी थुनाभित्रै पनि दलितको मृत्यु हुन थालेको छ । यसले प्रहरी मेरो साथीको अनुभूति जनताले गर्न सकिरहेका छैनन् ।’
त्यसैगरी, उनले बजारबाट सामान नियन्त्रणमा लिएर पनि सीमाबाट नियन्त्रणमा लिएको घटनाबारे आफूले बुझेको बताउँदै उनले यस्तो नगर्नसमेत निर्देशन दिए । ‘म कुनै पनि तस्करलाई उन्मुक्ति दिनुस् भन्दिनँ,’ मुख्यमन्त्री राउनतले भने, ‘तर आग्रह, पूर्वाग्रहभन्दा माथि आएर आफ्ना व्यबहार परिवर्तन गर्नु जरुरी छ ।’
यसका अलवा उनले समाजमा अपराध बढ्दै गएपछि अपराधीलाई बचाउने ठूलाबडाहरु मतियारको रुपमा देखा पर्न थालेको बताए ।