संस्कृति, पर्यटन तथा नागरिक उड्यनमन्त्री योगेश भट्टराईले पछिल्लो समय चिनियाँ राजदूतको सक्रियताको बचाउ गरेका छन् ।
पूर्वएमालेमा रहँदा वरिष्ठ नेता माधवकुमार पक्ष रहेका, तर मन्त्री बनेपछि ओली निकटस्थ भएका भट्टराईले चिनियाँ राजदूत होउ यान्छीको संक्रिएताको बचाउ गरेका हुन् ।
मन्त्री भट्टराईले नेपाल कम्युनिस्ट पार्टी (नेकपा)को विवाद समाधानका लागि बुधबार सामाजिक सञ्जाल ट्विटरमा चारबुँदे स्ट्याटस लेख्दै उनको बचाउ गरेका हुन् ।
भारत र चीनको तुलना गर्दै उनले सो ट्विटमा उनले भारतले ’फुटाउ र राज गर’को नीति अख्तियार गरेको, तर चीनले सहमति, एकता र सद्भावमा ध्यान दिएको उल्लेख गरेका छन् ।
भारतको नाम उल्लेख नगरिकन उनले उसले संविधान बनाउन नदिएको, हिमाल, पहाड र तराईका बीचमा अन्तर्विरोध चर्काएको आरोप लगाएका छन् । यसका अलवा उनले नेपालमाथि नाकाबन्दी लगाएको, पार्टीभित्रको अन्तर्विरोधमा घ्यू थपेको आरोपसमेत लगाएका छन् ।
त्यस्तै, चीनको नाम नलिई भट्टराईले चीनतर्फ संकेत गर्दै संविधान निर्माणमा सद्भाव राखेको, नेपालको समग्र एकताको प्रयत्न गरेको बताएका छन् । भारतले नाकाबन्दी लगाउँदा नेपालीलाई बाँच्न देऊ भनेको र दलहबीचको आन्तरिक एकता र नेपालको सम्मृद्धिप्रति सद्भाव राखेको उल्लेख गरेका छन् । उनले अन्तमा अरूको कुरा सुन्नु राम्रो हो भन्दै निर्णय गर्ने अधिकार आफूमा रहेको बताएका छन् ।
यस्ता छन् भट्टराईले सामाजिक सञ्जाल फेसबुकमा लेखेका चार बुँदा
१. संविधान बनाउने बेलामा असफल पार्न खोज्नु ठिक वा संविधान निर्माणप्रति सद्भाव राख्नु ठिक ?
२. पहिलो र दोस्रो संविधानसभाको बेलामा तराई र पहाड, जाति जनजातिको सामान्य अन्तर्विरोधलाई चर्काएर नेपालमा विग्रह ल्याउन प्रयत्न गर्नु ठिक वा त्यसलाई हल गर्न र नेपाल र नेपालीको एकताप्रति सद्भाव राख्नु ठिक ?
३. नेपालमाथि नाकाबन्दी लगाएर हायलकायल पार्न खोज्नु ठिक वा त्यो गलत हो, नेपाल र नेपालीलाई बाँच्न देऊ भन्नु ठिक ?
४. पार्टी–पार्टी र पार्टीभित्रको अन्तर्विरोधमा घ्यू थपेर नेपालको लोकतन्त्रलाई कमजोर बनाउनु र अस्थिरता सिर्जना गर्नु ठिक वा सबै पार्टीबीचमा राम्रो एकता बनाउँदै नेपालको समृद्धिप्रति सद्भाव राख्नु ठिक ?
कुनै पनि विदेशी राजनीतिक तथा कूटनीतिक गतिविधिलाई यसै सन्दर्भबाट हेरियो भने सही हुन्छ । कसैको पनि कुरा सुन्नु राम्रो हो । मान्ने नमान्ने अधिकार हाम्रो हो ।
