काठमाडौं । नेकपा अध्यक्षद्वयबीच भएको छलफल सकारात्मक भएको छलफलमा सहभागी नेकपा महासचिव विष्णु पौडेल र जनार्दन शर्माले बताएका छन् ।
उनीहरुले दुई अध्यक्षबीच भएको सो छलफलमा एकताको मर्मअनुरुप अघि बढ्ने समझदारीअनुरुप सहमति पनि भएको बताए ।
‘छलफल सौहार्दपूर्ण र खुलेर, भयो’, जनार्दन शर्माले भने, ‘पुनः अर्को चरण बसेर सबै विषयमा कुराकानी गर्ने सहमति भएको छ ।’
त्यसैगरी, छलफलपश्चात् नेकपा महासचिव विष्णु पौडेलले पनि दुवै अध्यक्षले खुलेर कुराकानी भएको बताए ।
‘उहाँहरूबीच आज निकै खुलस्त कुराकानी गर्नुभयो। दुबै अध्यक्षले आफूलाई लागेका कुराहरू राख्नुभयो,’ पौडेलले भने ।
नेकपाभित्रको पछिल्लो विवादले कतै यो पार्टी विघटन त हुने होइन भन्ने शंका उपशंका भइरहेका बेला भएको यस छलफलले नेपाली राजनीतिक तरंगलाई पुनः मोडिदिएको छ ।
आज भएको छलफलमा ओली प्रचण्डबाहेक महासचिव विष्णु पौडेल र नेता जनार्दन शर्मा सहभागी थिए ।
नेकपा स्थायी कमिटीको जारी बैठकमा प्रधानमन्त्री केपी शर्मा ओलीको चौतर्फी विरोध भइरहेका बेला ओलीले मन्त्रिपरिषद् बैठक राखी संसदको बर्खे अधिवेशन अन्त्य गरेसँगै घटनाले फरक मोड लिएको थियो ।
सो कारणले जारी नेकपा स्थायी कमिटी बैठक विवाद समाधानकै लागि भन्दै शनिबारसम्मका लागि स्थगित गरिएको छ ।
दुई अध्यक्षबीच शनिबार बिहान पुनः छलफल गर्ने सहमति भएको छ ।
त्यसैगरी नेकपाकाे स्थायी कमिटी बैठक पनि शनिबारै पुन: बस्ने गरी स्थगित भएको छ ।
