काठमाडौं । नेपाली कांग्रेसका सांसदले प्रदेश १ को संसद अवरुद्ध गरेका छन् ।
काठमाडौं प्रवेश गर्न अवरोध गरी केन्द्र सरकारले आफ्ना नागरिकलाई दुःख दिँदा प्रदेश सरकार चुप बसेको भन्दै उनीहरुले सोमबार संसद अवरुद्ध गरेका हुन् ।
कांग्रेसले संसद अवरुद्ध गरेपछि प्रदेशसभा बैठक मंगलबार दिउँसो १ बजेका लागि बोलाइएको छ ।
कांग्रेस सांसदहरुले केन्द्रले आफूहरुलाई हेपाह प्रवृत्ति गरेको भन्दै त्यसको जवाफ मुख्यमन्त्रीसँग मागेका छन् ।
उनीहरुले आफ्नै मुलुकका नागरिकलाई नाकाबाट फर्काएर काठमाडौंले ज्यादती गर्दा प्रदेश सरकार रमिते बनेको आरोप लगाएका छन् ।
प्रमुख प्रतिपक्षी नेपाली कांग्रेसका सांसदहरुले आफ्ना नागरिक काठमाडौं छिर्न नपाउनुको कारणबारे मुख्यमन्त्रीबाट जवाफ नआएसम्म सदन चल्न नदिने बताएका छन् ।
