काठमाडाैं । महिला सांसदहरुले महिलाहरुका लागि छुट्टै क्वारेन्टाइन बनाउन माग गरेका छन् ।
प्रतिनिधसभा बैठकमा बोल्दै महिला सांसदहरुले बिहबार सरकारसँग यस्तो माग गरेका हुन् ।
कोभिड–१९ महामारी नियन्त्रणका लागि सरकारले देशका विभिन्न स्थानमा व्यवस्था गरेको क्वारेन्टाइन असुरक्षित बनेको बताउँदै उनीहरुले महिलाका लागि छुट्टै क्वारेन्टिनको व्यवस्था गर्नुपर्ने धारणा राखेका छन् ।
साथै, क्वारेन्टिनमा महिला बलात्कृत हुनु अत्यन्त गम्भीर भएको उल्लेख गर्दै महिलाका लागि छुट्टै क्वारेन्टाइनको व्यवस्था र सुरक्षाका लागि महिला प्रहरी राख्न माग पनि महिला सांसदले माग गरेका छन् ।
कसले के भने
प्रतिनिधिसभाको आजको वैठकको शून्य समयमा सांसद थममाया थापाले क्वारेन्टिनमा महिला बलात्कृत हुनु अत्यन्त गम्भीर भएको उल्लेख गर्दै महिलाका लागि छुट्टै क्वारेन्टाइनको व्यवस्था र सुरक्षाका लागि महिला प्रहरी राख्न माग गरिन् ।
त्यसैगरी, सांसद पवित्रा खरेल निरौलाले कैलालीको लम्कीमा महिलामाथि भएको घटनाका दोषीलाई कडा कारबाही गरिनुपर्ने माग गरिन् भने सांसद नरमाया ढकालले क्वारेन्टाइन यातना गृहजस्तो भएकाले तत्काल क्वारेन्टाइको अवस्थामा सुधार गर्न माग गरिन् ।
सांसद पार्वता डिसी चौधरीले कैलाली घटनाबारे आपत्ति जनाउँदै क्वारेन्टिनमै असुरक्षित महिला कहाँ सुरक्षित होलान भनी प्रश्न गरिन् । उनले भनिन्, 'घटनामा संलग्नलाई कडा कारबाही गर्नुपर्छ ।'
सांसद पूर्णकुमारी सुवेदीले कैलालीको क्वारेन्टाइन बिरामी महिलामाथि भएको घटनाको भत्सर्ना गर्दै दोषीलाई कडा कानुनी कारबाही गर्न माग गरिन् ।
सांसद टेकबहादुर बस्नेतले क्वारेन्टाइनलाई व्यवस्थित बनाउँदै स्वास्थ्य सामग्री सिधै जिल्ला र स्थानीय तहलाई हस्तान्तरण गर्न आग्रह गरिन् ।
सांसद डा दीपकप्रकाश भट्टले देशव्यापी रुपमा कोरोना सङ्क्रमणको जोखिम बढेकाले कोरोना परीक्षणको दायरा बढाउन माग गरिन् ।
सांसद नारदमुनी रानाले सुदूरपश्चिम प्रदेशमा कोरोना परीक्षणको दायरा फराकिलो बनाउन सरकारको ध्यानाकर्षण गराइन् ।
सांसद डिला सङ्ग्रौलाले स्वास्थ्य सामग्री खरिदमा अनियमिता भएको घटना सेलाउन नपाउँदै खरिपाटी क्वारेन्टाइनमा भएको घोटालाका बारेमा जानकारी दिन माग गरिन् ।
सांसद प्रमिला राईले स्वास्थ्य सामग्री खरिद प्रक्रियामा भएको अनियमितता छानबिन गर्न माग गरेकी छिन् ।
