काठमाडौं । वरिष्ठतालाई मिचेर डिनमा नियुक्त गरिएको भन्दै सत्तारुढ दल नेकपा विद्यार्थी संगठन अनेरास्ववियुले सरकारको विरोध गरेको छ ।
सरकारले प्रा.डा. दिव्यासिंह शाहलाई डिन नियुक्त गरेको र सो नियुक्त वरिष्ठतापिरित भएको भन्दै विद्यार्थी संगठनले सो सच्याउन माग गर्दै विद्यार्थी संगठनले आन्दोलन गरेको हो ।
विरोध गर्दै विद्यार्थी संगठनले बिहीबार त्रिभुवन विश्वविद्यालय चिकित्सा शास्त्र अध्ययन संस्था (आईओएम) को कार्यालयमा तालाबन्दी पनि गरेको छ ।
बुधबार प्रा डा प्रेम ज्ञवालीको संयोजकत्वमा गठित सर्च कमिटिले त्रिवि कार्यकारीसमक्ष प्रा डा प्रदीप वैध, प्रा डा दिव्या सिंह शाह र प्रा डा उत्तमकृष्ण श्रेष्ठलाई डिनका लागि सिफारिस गरेको थियो ।
संगठनले प्राध्यापक डा. गोविन्द केसीको आन्दोलनले स्थापित गरेको योग्यता, क्षमता र वरिष्ठताको आधारमा डिन नियुक्ति गर्ने थितिलाई निरन्तरता दिन पनि माग गरेको छ ।
संगठनले प्रधानमन्त्री केपी शर्मा ओलीको दबाबमा उपकुलपति धर्मकान्त बाँस्कोटाले वरिष्ठताको सूचीमा ३३ औँ नम्बरमा रहेकी शाहलाई नियुक्ति गरेको बताएको छ ।
शाह प्रधानमन्त्री ओलीको निजी चिकित्सक हुन् ।
