चितवन । चितवनमा जडीबुटी तेल प्रशोधन उद्योग स्थापना भएको छ ।
जिल्ला जडीबुटी सहकारी सङ्घले रत्ननगर नगरपालिका–११ मङ्गलपुरमा सो उद्योग स्थापना गरेको हो ।
जिल्ला जडीबुटी सहकारी सङ्घका अध्यक्ष कुलप्रसाद देवकोटाले करिब ४० लाखको लगानीमा सो उद्योग स्थापना गरिएको बताए ।
यसअघि सो उद्योग नहुँदा चितवनमा उत्पादन भएको जडीबुटी बारा जिल्ला निर्यात हुँदै आएको थियो ।
उद्योग स्थापनासँगै जिल्लामा वार्षिक दुई हजार लिटर तेल उत्पदन हुने बताइएको छ ।
चितवनमा ५० किसान जडीबुटी खेतीमा आबद्ध छन् । कतिपय सहकारी आफैँले पनि जडीबुटी खेती गरेका छन् ।
भरतपुर र रत्ननगरका विभिन्न क्षेत्र, सामुदायिक वन र कवुलियती वनमा जडीबुटी खेती गरिएको छ ।
चितवनमा मेन्था, सिटोमेला, क्यामामाइल, लेमन ग्रास, तितेपातीलगायतका जडीबुटी उत्पादन हुने गरेको छ । एउटै सिजनमा मेन्था १० टन, सिटोमेला ३० टन उत्पादन भएको जडीबुटी सङ्घले जनाएको छ ।
