काठमाडौं । सरकारले नेपाली भूमि अतिक्रमण गरेर सीमा क्षेत्र (लिपुलेक) मा बनाएको सडकबारे वार्ता गर्न धेरै पर्खिन नसक्ने बताएको छ ।
भारतले नेपाली भूमि अतिक्रमण गरेर लिपुलेकमा सडक बनाएपछि नेपालले आपत्ति जनाउँदै त्यसलाई यथास्थितिमा राख्न माग गरेको छ ।
भारतले भने, आफ्नै भूमिमा सडक बनाएको दाबी गर्दै आएको छ ।
यसका साथै भारतले कोरोना भाइरसको महामारीपछि सीमा समस्याबारे नेपालसँग वार्ता गर्न तयार रहेको प्रतिक्रिया दिएको छ ।
तर नेपालले त्यसबेलासम्म पर्खिन नसक्ने परराष्ट्रमन्त्री प्रदीप ज्ञवालीले बताएका छन् ।
अन्तराष्ट्रिय सम्बन्ध समितिको सोमबार बसेको बैठकमा परराष्ट्रमन्त्री ज्ञवालीले भने, ‘अस्ती भारतीय विदेश मन्त्रालयका प्रवक्ताको वक्तव्य हेर । कोरोनापछि वार्ता गर्न तयार छौं भन्नुभएको छ । हामी त्यति पर्खिने पक्षमा छैनौं । छिटो वार्ता सुरु गर्नुपर्छ ।’
समिति बैठकमा पूर्वप्रधानमन्त्री माधवकुमार नेपाललगायतले भारतसँग भर्चुअल वार्ता गर्न सुझाएका थिए ।
