नेपाल विद्यार्थी संघले निर्वतमान सञ्चारमन्त्री गोकुल बाँस्कोटालाई कानुनी कारबाहीको माग गर्दै गरेकाे आन्दोलनमा नेविसंघ अध्यक्षसहित दजनौँ नेता कार्यकर्ता घाइते पएपछि प्रहरीकै फुली खोस्ने चेतावनी दिएका छन् ।
आफूविरुद्ध प्रहरी प्रशासनबाट भएको धरपकडको विरोधमा शुक्रबार प्रदर्शनीमार्गमा भएकाे बृहत् विरोध सभालाई सम्बोधन गर्दै नेविसंघ अध्यक्ष राजीव ढुंगानाले शान्तिपूर्ण प्रदर्शनमा दमन गर्ने प्रहरी अधिकृतको फुली खोस्ने चेतावनी दिए ।
‘फुली थपिने आशामा छात्रामाथि पुरुष सुरक्षाकर्मी लगाएर लाठीचार्ज, कति बहादुर डीएसपी । ओली सत्ताबाट गएको दिन, काँग्रेस सरकारमा आएको दिन तपाईंको फुली खोस्छौं,’ अध्यक्ष ढुंगानाले भने ।
यस्तै महामन्त्री दीपक भट्टराईले नेविसंघलाई नजिस्क्याउन प्रहरीलाई चेतावनी दिएका छन्- ‘नेविसंघलाई जिस्क्याउँदा सरकार र सुरक्षाकर्मीले हेक्का राख्दा हुन्छ, के हुन्छ भनेर । त्यसको ठूलो मूल्य चुकाउनुपर्छ ।’
निवर्तमान सञ्चारमन्त्री बाँस्कोटाले राजीनामा दिँदैमा उन्मुक्ति नमिल्ने भन्दै कानुनी कारबाही अगाडि नबढाउँदासम्म नेविसंघले आन्दोलन जारी राख्ने भटराईले चेतावनी दिए ।
