नागरिक सम्पत्तिमाथि खेलबाड हुन थालेकाले जनता सङ्घर्षमा उत्रन बाध्य हुनुपर्ने अवस्था सिर्जना भएको राष्ट्रिय प्रजातन्त्र पार्टी (संयुक्त) का अध्यक्ष डा. प्रकाशचन्द्र लोहनीले बताएका छन् ।
देशमा विकसित बेथिति, भ्रष्टाचार र राज्यसत्ताको लुटतर्फ इङ्गित गर्दै अध्यक्ष लोहनीले जनताले आफ्नो भूमिका निभाउन बाध्य हुनुपर्ने टड्कारो आवश्यकता रहेको पनि बताए ।
प्रजातन्त्र दिवसको अवसरमा शुभकामना दिँदै लोहनीले भनेका छन्, प्रजातन्त्रको मान्यताअनुसार देशको सार्वभौमिकता, शासन व्यवस्थाको आधार जनताको सर्वोच्चतामा निहित हुन्छ ।
‘प्रजातान्त्रिक पद्धतिको यही यथार्थ बुझेर शासनमा बस्नेहरूले काम गर्नु पर्ने हो तथापि जनताको साधन श्रोत र सम्पत्तिमाथि खेलबाड भएको छ । त्यसैले त्यसको विरुद्धमा जनता आफै उत्रनु पर्छ भन्ने चिन्तन आजको आवश्यकता भएको हो,’ सन्देशमा उनले भनेका छन् ।
साथै उनले देशको भौगोलिक अखण्डता, राष्ट्रिय स्वाधीनता र नेपाली जनताको स्वतन्त्रतालाई थप सुदृढ गर्दै देशलाई विकास र समृद्धिको मार्गमा अगाडि बढाउन सकिने विश्वास व्यक्त गरेका छन् ।
‘ऐतिहासिक जनआन्दोलनमार्फत सार्वभौम नेपाली जनताले फागुन ७ गते राणा शासन ढालेर प्रजातन्त्र स्थापना गरेको गौरवपूर्ण र अविस्मरणीय दिन हो,’ लोहनीले शुभकामना सन्देशमा उल्लेख छ ।
