काठमाडौँ । नेकपा एमाले र माओवादी केन्द्र मिलेर बनेको नेकपाले फागुन १ गते शहीद स्मृति सभा गर्ने भएको छ ।
एकताअघि माओवादीले जनयुद्ध दिवस मनाउँदै आएको थियो । एकतापछि माओवादीले जनयुद्ध सुरु गरेको दिनलाई कसरी स्मरण गर्ने भन्नेमा अझै निर्णय भएको थिएन । एमालेले माओवादीले भनेको सशस्त्र सङ्घर्षलाई कहिल्यै पनि जनयुद्धको रूपमा स्वीकार गरेको थिएन ।
नेकपाले फागुन १ गते देशैभर श्रद्धाञ्जली गर्ने भएको हो ।
नेकपाका केन्द्रीय सदस्य विष्णु रिजालले जनआन्दोलन तथा जनयुद्धका शहीदको स्मृतिमा आयोजित श्रद्धाञ्जली गरिने जानकारी दिएको राससले जनाएको छ ।
उनका अनुसार ७७ वटै जिल्ला कमिटीलाई रचनात्मक तरिकाले कार्यक्रम गर्न निर्देशन दिइएको छ ।
काठमाडौँमा पार्टी केन्द्रीय कार्यालय धुम्वाराहीमा गरिने सभामा प्रधानमन्त्री तथा पार्टी अध्यक्ष केपी शर्मा ओली र पूर्वप्रधानमन्त्री एवं पार्टी अध्यक्ष पुष्पकमल दाहाल 'प्रचण्ड'ले सम्बोधन गर्ने कार्यक्रम छ ।
